Vaşinqton Bakı və İrəvanın danışıqlarda əldə etdiyi irəliləyişi alqışlayır. Azadmedia.az xəbər verir ki, bunu ABŞ Prezidentinin Milli Təhlükəsizlik müşaviri Ceyk Sallivan deyib.

Bundan əvvəl bildirilmişdi ki, ABŞ-ın milli təhlükəsizlik müşaviri Ceyk Sallivanın vasitəçiliyi ilə mayın 3-də Vaşinqtonda Azərbaycan və Ermənistan xarici işlər nazirləri Ceyhun Bayramov və Ararat Mirzoyan arasında danışıqlar aparılıb.

"Biz Azərbaycan və Ermənistanın danışıqlarda əldə etdiyi irəliləyişi alqışlayırıq və dialoqun davam etdirilməsini təşviq edirik. Davamlı və ədalətli razılaşma hər iki ölkə və bütövlükdə region üçün imkanların açılmasının açarı olacaq", - Sullivan tvitter hesabında yazıb.

Xatırladaq ki, mayın 1-də Azərbaycan və Ermənistan xarici işlər nazirləri Ceyhun Bayramov və Ararat Mirzoyan ABŞ-ın dövlət katibi Entoni Blinkenlə ayrı-ayrılıqda görüşüb, daha sonra onun iştirakı ilə üçtərəfli görüş keçiriblər. Bir neçə gündür ki, Vaşinqtonda Azərbaycan və Ermənistan xarici işlər nazirləri arasında danışıqlar gedir.