Avropa Şurasının İrqçilik və Dözümsüzlüklə Mübarizə üzrə Avropa Komissiyası (ECRI) Azərbaycanda miqrantların inteqrasiyası sahəsində əldə edilən irəliləyişi alqışlayır. Azadmedia.az xəbər verir ki, bu barədə ECRI-nin hesabatında deyilir.

Əvvəlki hesabat 2016-cı ilin mart ayında qəbul edildikdən sonra irəliləyiş əldə edilmiş və ən yaxşı təcrübələr hazırlanmışdır.

“Məktəb proqramlarına insan hüquqları ilə bağlı mövzular daxil edilib. Hakimiyyət orqanlarının Azərbaycanda qeyri-qanuni yaşayan miqrantların hüquqi statusunun sadələşdirilməsi istiqamətində səyləri müsbət nəticə verib və xüsusən də ölkədə bu şəxslərin sayının 10 faiz azalmasına səbəb olub. “İnformasiya, İnformasiyalaşdırma və İnformasiyanın Mühafizəsi haqqında” Qanun indi internet provayderlərinə və fiziki şəxslərə zorakılığı, dini ekstremizmi və ya nifrət nitqini təbliğ edən hər hansı məlumatı yaymağı qadağan edir və onlardan səkkiz saat ərzində bu cür qanunsuz məzmunu silməyi tələb edir. - materialda deyilir.

ECRI qeyd edir ki, miqrantların inteqrasiyası və onların dövlət xidmətlərinə və faydalarına çıxışının təmin edilməsinə mühüm səylər sərf edilib.

“Elektron prosedurların tətbiqi sayəsində iş və yaşayış icazələrinin verilməsi də sadələşdirilib və sürətləndirilib. Daimi yaşayış yeri olan əmək miqrantları Azərbaycan vətəndaşları ilə eyni sosial müdafiə hüquqlarından istifadə edirlər, qaçqınlar isə 2020-ci ildən əmək bazarına daxil olmaq hüququna malikdirlər”, - deyə hesabatda bildirilir.