Ağ Ev: Vilnüs sammitindən sonra Ukrayna NATO-ya üzv olmayacaq

ABŞ prezidentinin milli təhlükəsizlik üzrə köməkçisi Ceyk Sallivan jurnalistlərə bildirib ki, Ukrayna Vilnüs sammitinin nəticələrinə görə NATO-ya üzv ola bilməyəcək, çünki üzvlüklə bağlı hələlik bir sıra tələblərə cavab verməyib. Bu barədə TASS məlumat yayıb.
Bundan əvvəl Ukraynanın xarici işlər naziri Dmitri Kuleba bildirib ki, NATO ölkələri Vilnüs sammitində belə bir qərarı elan etməyə hazır deyillərsə, Ukraynanı nə vaxt alyansa dəvət edə biləcəklərini açıqlamalıdırlar. Kulebanın qeyd etdiyi kimi, Ukrayna hakimiyyəti Ukraynanın gələcək üzvlüyünə doğru “güclü addım” atmağı xahiş edir. Diplomat Ukraynanın NATO sammitindən əldə etməyi gözlədiyi üç şeyi sadalayıb. Kuleba qeyd edib ki, NATO-ya üzvlük üçün formal tələblər var, lakin alyansa dəvətin tələbi yoxdur. Onun sözlərinə görə, bunun üçün yalnız strateji uzaqgörənlik və siyasi iradə lazımdır.

İyulun 7-də NATO-nun baş katibi Yens Stoltenberq Ukrayna prezidenti Vladimir Zelenskinin NATO-nun Vilnüs sammiti çərçivəsində keçiriləcək Ukrayna-NATO Şurasının ilk iclasında iştirak edəcəyini bildirib.