Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev “Vestnik Kavkaza”nın müxbirinə müsahibəsində vurğulayıb ki, mövcud vəziyyətin yaranmasına Laçın yolundan hərbi məqsədlər üçün istifadə edən Ermənistan tərəfinin hərəkətləri səbəb olub.

Ekspert vurğulayıb ki, indiki vəziyyətdən çıxış yolu var - bunu təklif edən Azərbaycandır. Bu, Ağdam-Xankəndi yoludur. Deməli, əgər erməni tərəfi həqiqətən də Rusiya sülhməramlılarının müvəqqəti yerləşdiyi Azərbaycan ərazisində humanitar vəziyyətdən narahatdırsa, o zaman Ağdam marşrutundan istifadə edə bilər.

"Problem ondadır ki, Ermənistan tərəfinin Laçından dəqiq nəzarətsiz keçidə ehtiyacı var. Ona görə də bunun ətrafında təxribat təşkil olunur. Paşinyanın Azərbaycanın ərazi bütövlüyünü tanıdığına dair verdiyi vədlərə baxmayaraq, gözlənti ondan ibarətdir ki, indi Ermənistan təkbaşına hərəkət etməyəcək, əksinə hərəkət edəcək. Azərbaycana qarşı təzyiqlər beynəlxalq ictimaiyyət, beynəlxalq təşkilatlar, Aİ, yəni üçüncü tərəflər vasitəsilə həyata keçiriləcək.Əslində bunlar həm də Azərbaycana qarşı ərazi iddialarıdır”, - Fərid Şəfiyev bildirib.