Rusiya və Türkiyə prezidentləri Vladimir Putin və Rəcəb Tayyib Ərdoğan Türkiyə liderinin sentyabrın 19-25-də təşkilatın Baş Assambleyasının yüksək səviyyəli həftəsinin keçiriləcəyi BMT-dəki təmaslarından sonra yeni görüş keçirə bilərlər. Azadmedia.az xəbər verir ki, bu barədə “Hürriyet” qəzeti məlumat yayıb.

Sentyabrın 4-də Soçidə keçirilən danışıqlarda kasıb Afrika ölkələrinə 1 milyon ton taxıl tədarükü ilə bağlı Putinin təklifinə Ərdoğan müsbət reaksiya verib. "Putinin bəyanatlarından belə nəticəyə gəldik ki, taxıl dəhlizi ilə bağlı danışıqlar bir müddət davam edəcək. Hər iki lider Ərdoğanın BMT-dəki təmaslarından sonra yenidən görüşə bilər", - Türkiyə prezident administrasiyasına yaxın nəşrin köşə yazarı Abdulkadir Selvi yazır.

“Ərdoğan taxıl dəhlizi ilə bağlı çox aydın danışdı. O qeyd edib ki, BMT ilə birgə hazırlanmış təkliflər paketinin (taxıl sazişinin bərpası ilə bağlı) uğur qazanacağına ümid edir. Bu vaxt tələb edir”, - deyə o bildirib.

Yerli diplomatik mənbənin məlumatına görə, Türkiyə yaxın günlərdə Qara dəniz taxıl təşəbbüsünün bərpasına dair iki ölkə prezidentləri arasında Soçidə aparılmış danışıqların nəticələri barədə BMT-yə məlumat verəcək.

Sentyabrın 4-də Putinlə danışıqlardan sonra Soçidə keçirilən mətbuat konfransında çıxış edən Ərdoğan deyib ki, Ankara BMT ilə birlikdə Qara dəniz taxıl təşəbbüsünü bərpa etmək məqsədi ilə yeni təşəbbüslər toplusu hazırlayıb və onun müsbət qiymətləndirilməsinə ümid edir.