Azərbaycan Respublikasının Prezidenti İlham Əliyev sentyabrın 28-də Heydər Əliyev Fondu tərəfindən inşa edilən Zəngilan şəhər məscidində görülən işlərlə tanış olub.

Dövlətimizin başçısına məsciddə görülən işlər barədə məlumat verildi.

Qeyd edək ki, Azərbaycan torpaqlarının Ermənistan tərəfindən işğalı illərində Zəngilan rayonundakı tarixi, dini, mədəniyyət abidələri də erməni vandalizminə məruz qalıb, dağıdılıb, dağıdılıb. Zəngilan şəhərindəki məscid mal-qara üçün istifadə olunurdu. İşğal altında olan torpaqlarımız azad edildikdən sonra Qarabağdakı tarix, dini və mədəniyyət abidələrinin bərpası layihələri çərçivəsində Zəngilan məscidində tikinti-bərpa işlərinə başlanılıb. Heydər Əliyev Fondunun təşkilatçılığı ilə yerli və xarici ekspertlərin daxil olduğu işçi qrupu məscidin vəziyyətini qiymətləndirmiş, binanın konservasiyası və bərpası, o cümlədən bu ərazidə yeni məscidin tikintisi ilə bağlı qərar qəbul edilmişdir.

Zəngilanda tikilən məscidin təməli 2021-ci il aprelin 26-da Azərbaycan Respublikasının Prezidenti İlham Əliyev tərəfindən qoyulub.

Ötən müddət ərzində yeni məscidin layihəsi hazırlanıb və tikintisinə başlanılıb. Məscidin tikintisini Heydər Əliyev Fondu, “Paşa Holdinq” MMC-nin dəstəyi ilə həyata keçirir.

Hazırda məscidin daxili bəzəyi üzrə işlər davam etdirilir, ərazidə abadlıq işləri aparılır. Layihənin 2024-cü ilin aprelində başa çatdırılması planlaşdırılır.