Rusiya və Türkiyə prezidentləri Vladimir Putin və Rəcəb Tayyib Ərdoğan telefonla Fələstin-İsrail münaqişəsinin gərginləşməsini müzakirə ediblər. Azadmedia.az xəbər verir ki, bu barədə Kremlin saytında məlumat verilib.

“Əsas diqqət Fələstin-İsrail münaqişəsi zonasında vəziyyətin kəskin şəkildə pisləşməsinə yönəlib. Zorakılığın davam etməsi və mülki əhali arasında itkilərin sayının fəlakətli şəkildə artması ilə bağlı dərin narahatlıq ifadə olunub.

Hər iki tərəfin dərhal atəşkəs əldə etməsi və danışıqlar prosesinin bərpasının zəruriliyi vurğulanıb. Bunu fəal şəkildə təşviq etməyə qarşılıqlı hazır olduqları bildirilib. Vurğulanıb ki, Yaxın Şərq böhranının uzunmüddətli sülh yolu ilə həlli müstəsna olaraq BMT Təhlükəsizlik Şurasının təsdiq etdiyi və 1967-ci il sərhədləri daxilində müstəqil Fələstin dövlətinin yaradılmasını nəzərdə tutan “iki dövlət” formuluna əsasən mümkündür.

Müxtəlif sahələrdə Rusiya-Türkiyə əməkdaşlığının müəyyən məsələlərinə də toxunulub.

İki ölkə liderləri arasında təmaslar davam etdiriləcək”, - məlumatda deyilir.