ABŞ-ın Ermənistandakı səfiri Kristina Kuinn Aİ-nin monitorinq missiyasının nümayəndələri ilə birlikdə respublikanın Azərbaycanla həmsərhəd Tavuş rayonuna səfər edib. Bu barədə missiyanın mətbuat xidməti məlumat yayıb.

“ABŞ səfiri Kristina Kuinn Tavuş vilayətinin ərazilərində patrul xidməti aparan EUMA-ya (müşahidəçilər missiyası - red.) qoşulub. Səfər missiyanın İcevandakı əməliyyat bazasının köməyi ilə baş tutub”, - məlumatda deyilir.

Yada salaq ki, Xarici İşlər Şurasının Avropa İttifaqının xarici işlər nazirlərinin iştirakı ilə keçirilən iclasından sonra Aİ diplomatiyasının rəhbəri Cozep Borrel Ermənistanda missiyanın gücləndirilməsi, əməkdaşların və patrulların sayının artırılması barədə qərar qəbul etdiyini açıqlamışdı.