Türkiyə prezidenti Rəcəb Tayyib Ərdoğan bildirib ki, Türkiyə və Almaniya birgə səylərlə Yaxın Şərqi bütün regiona yayılan “İsrail və Fələstin arasında münaqişə alovundan” xilas edə bilərlər. O, bu barədə Almaniya kansleri Olaf Şolzla TRT Haber telekanalında yayımlanan mətbuat konfransında bildirib.

“Əgər biz Türkiyə və Almaniya humanitar atəşkəsi təmin edə bilsək, münaqişə alovunun bütün regiona yayılmasının qarşısını almaq imkanımız olacaq. Atəşkəs bizim hamımız üçün əsas prioritetdir”, - deyə Ərdoğan bildirib.

Bundan əvvəl Türkiyə lideri bildirib ki, Ankara Fələstin-İsrail münaqişəsinin kəskinləşməsi fonunda Avropa İttifaqında dəqiq mövqe görmür.

O, həmçinin bildirib ki, Yaxın Şərqin bütün ölkələri, o cümlədən müharibə edən tərəflər - Fələstin və İsrail Qəzza zolağı ilə bağlı beynəlxalq sülh konfransında iştirak edə biləcək.