Rusiya Federasiyası ilə Gürcüstanı birləşdirən Gürcüstan Hərbi Yolu ilə bütün növ avtomobillərin hərəkəti pisləşən hava şəraiti ilə əlaqədar dayandırılıb. RİA Novosti bu barədə Fövqəladə Hallar Nazirliyinin Şimali Osetiya üzrə departamentinə istinadən xəbər verir.
Qeyd olunur ki, bu, Gürcüstan ərazisində hava şəraitinin pisləşməsi, avtomobillərin təhlükəsiz keçidinin təmin oluna bilməməsi və gürcü sərhədçilərinin tövsiyələrinin nəzərə alınması ilə bağlıdır.

Gürcüstan Hərbi Yolu təkcə Gürcüstanı deyil, Ermənistanı da Rusiya Federasiyası ilə birləşdirən yeganə quru yoludur.

Noyabrın 11-də Şimali Osetiya Fövqəladə Hallar Nazirliyinin baş idarəsinin mətbuat xidməti Gürcüstan Hərbi Yolu ilə ağır avtomobillərin keçidinin bağlandığını bildirib. Bundan əvvəl, avqust ayında Vladiqafqaz administrasiyası güclü yağışdan sonra şəhərdə fövqəladə vəziyyətin tətbiq edildiyini açıqlamışdı.