Ermənistan əvvəllər olduğu kimi bundan sonra təkcə Rusiya ilə hərbi-texniki əməkdaşlığı inkişaf etdirə və müdafiə əlaqələrini artıra bilməz. RBC yazır ki, bunu baş nazir Nikol Paşinyan Ermənistanın İctimai Radiosuna müsahibəsində deyib.

Paşinyanın fikrincə, Ermənistan ordunun inkişafı konsepsiyasını dəyişməlidir. O, ilin sonuna qədər müvafiq sənədin qəbul olunacağını istisna etməyib. Baş nazir hesab edir ki, digər dövlətlərlə qarşılıqlı fəaliyyətə yenidən baxmaq və ölkənin müdafiə sektorunda kiminlə və necə əməkdaşlıq etməli olduğu ideyasını ortaya qoymaq lazımdır.

“Biz başa düşməliyik ki, kiminlə hərbi və hərbi-texniki əməkdaşlığı inkişaf etdirməliyik. Əvvəllər konsepsiya ilə bağlı heç bir çətinlik olmadığı kimi, belə bir sual da yox idi. Əvvəllər Ermənistanın müdafiə əlaqələri 97% Rusiya ilə bağlı idi. İndi bu, obyektiv və subyektiv səbəblərə görə baş verə bilməz”, - Paşinyan bildirib

Konsepsiyada həyata keçiriləcək konkret sazişlər olmalıdır, deyə baş nazir davam edib. Ermənistan da anlamalıdır ki, İran, Hindistan, Gürcüstan, ABŞ, Fransa və Rusiya ilə hansı münasibətlər qurur, KTMT-nin tərkibində qalıb-qalmayacaq.