Ukrayna prezidenti Vladimir Zelenski bildirib ki, Polşa ilə sərhəddə Polşa tərəfindəki etirazçılar tərəfindən əngəllənməyə davam edən vəziyyət “həm iqtisadiyyat, həm də mənəviyyat” həddini aşıb.
"Biz nəhayət, vəziyyətin həllini tapmalıyıq, xüsusən də həm iqtisadiyyat, həm də mənəviyyat sərhədlərini çoxdan keçmiş Polşa sərhədində" Telegram kanalında videomüraciətində deyən Zelenski hesab edir ki, Polşa Ukraynadakı vəziyyətdən “daxili siyasi mübarizəsində” istifadə etməməlidir.

Kiyev və Varşava arasında münasibətlər polşalı fermerlərin sərhəd keçid məntəqələrini bağlaması səbəbindən pisləşib. Onlar 2022-ci il fevralın 24-dən sonra Avropa İttifaqının Ukraynadan yük maşınlarının sürücülərinə verdiyi güzəştlərin ləğvini tələb edir və Ukrayna kənd təsərrüfatı məhsullarının nəzarətsiz idxalına etiraz edirlər.
Ötən ay Zelenski Varşavaya vəziyyəti həll etmək üçün Avropa Komissiyasının nümayəndəsinin iştirakı ilə iki ölkənin sərhədində yüksək səviyyəli danışıqlar aparmağı təklif etmişdi. Daha sonra Polşanın baş naziri Donald Tusk bildirib ki, Polşa və Ukrayna hökumətləri martın sonunda sərhəddəki vəziyyətin həllini müzakirə edəcəklər.