Müdafiə nazirinin birinci müavini - Azərbaycan Ordusunun Baş Qərargah rəisi general-polkovnik Kərim Vəliyev Bakıda Pakistan Silahlı Qüvvələrinin Birləşmiş Qərargahının baş direktoru general-leytenant Əhsən Gülrezin rəhbərlik etdiyi nümayəndə heyəti ilə görüşüb. .

“Görüş zamanı Vəliyev ölkələrimiz arasında dostluq və qardaşlıq münasibətlərinin, o cümlədən Azərbaycan-Pakistan əlaqələrinin və strateji tərəfdaşlığın yüksələn xətlə inkişaf etdiyini bildirib”, - deyə Müdafiə Nazirliyindən bildiriblər.

Baş Qərargah rəisi Azərbaycan, Pakistan və Türkiyənin iştirakı ilə üçtərəfli birgə hərbi təlimlərin keçirilməsinin əhəmiyyətini xüsusi vurğulayaraq, bu cür təlimlərin ordularımız arasında təcrübə mübadiləsinin aparılması, hərbi qulluqçuların peşəkarlığının daha da yüksəldilməsi baxımından əhəmiyyətini qeyd edib.

Öz növbəsində Gülrez Azərbaycan ilə Pakistan arasında əlaqələrin daha da möhkəmlənməsi üçün bu cür görüşlərin və əlaqələrin genişləndirilməsinin zəruriliyini bildirib.

Görüşdə Azərbaycan ilə Pakistan arasında hərbi əməkdaşlığın inkişaf perspektivləri və qarşılıqlı maraq doğuran digər məsələlər ətrafında da fikir mübadiləsi aparılıb.