Avropa Parlamentinin deputatları çərşənbə günü, martın 13-də keçirilən iclasda Avropa İttifaqı ilə Ermənistan arasında münasibətləri gücləndirməyə çağıran qətnamə qəbul edib, həmçinin İrəvanı Aİ-yə namizəd olmaq üçün ərizə vermək barədə düşünməyə dəvət ediblər. Bu barədə RİA Novosti yazır.
AP hesab edir ki, əgər respublika öz demokratiyasını gücləndirən ardıcıl islahatlar yolu ilə davam etsə, o zaman Aİ ilə münasibətlərdə transformasiya üçün zəmin hazırlaya biləcək.
Parlamentarilər Avropa Komissiyasını və Aİ Şurasını erməni tərəfinin ittifaqla təkcə iqtisadi tərəfdaşlıq sahəsində deyil, həm də siyasi dialoq, xalqlar arasında əməkdaşlığı genişləndirmək istəyini fəal dəstəkləməyə çağırıblar.
Eyni zamanda, AP qeyd edib ki, Rusiyanın Ermənistan iqtisadiyyatına hələ də ciddi təsiri var. Bununla bağlı İrəvan “sanksiyalardan yayınma ehtimalı ilə bağlı sayıq olmalıdır”.
Deputatlar Moskvanın “Ermənistanı müstəqil siyasi və strateji seçiminə görə” cəzalandırmağa cəhd edə biləcəyinə də diqqət çəkiblər. Onlar əlavə ediblər ki, bu halda Aİ respublikaya yardım edəcək.