BMT Vladimir Putinin Rusiya Federasiyasının prezidenti seçilməsindən sonra Rusiya hökuməti ilə qarşılıqlı əlaqəni davam etdirəcək. Ria Novosti xəbər verir ki, bunu brifinqdə BMT baş katibinin mətbuat katibinin müavini Fərhan Haq deyib.

Ona BMT-nin baş katibi Antonio Quterreşin Rusiyada keçirilən prezident seçkiləri ilə bağlı mövqeyinin necə olduğu soruşulub.

“Bütövlükdə bu seçkilərlə bağlı heç bir şərhimiz yoxdur. Hökumətə gəldikdə, biz hökumətlə əlaqə saxlamağa davam edirik və bunu davam etdirəcəyik”, - deyə Haq cavabında bildirib.

Ondan Quterreşin Putinlə əlaqə saxlayıb-yaratmayacağı da soruşulub.

“Hökumət qurulanda biz hökumətlə qarşılıqlı əlaqəyə aid standart prosedurları tətbiq edəcəyik”, - deyə Haq cavab verib.

Bundan əvvəl Kreml Putini prezident seçkilərindəki qələbəsi münasibətilə kimin təbrik etdiyini bildirib.

Martın 15-dən 17-dək Rusiyada prezident seçkiləri, o cümlədən distant formatda səsvermə keçirilib. 2008-ci ildən bəri ilk dəfə prezident postu uğrunda dörd namizəd mübarizə aparıb: Vladislav Davankov (Yeni insanlar), Vladimir Putin (özünü irəli sürmüş namizəd kimi), Leonid Slutski (LDPR) və Nikolay Xaritonov (Rusiya Federasiyası Kommunist Partiyası).

Rusiya Federasiyası Mərkəzi Seçki Komissiyasının məlumatına görə, protokolların 100%-i işləndikdən sonra Putin 87,28% səs toplayıb.