Ermənistan və Europol transmilli cinayətkarlıqla uğurla mübarizə aparmaq üçün saziş imzalayıb. Bir ay əvvəl Gürcüstan Europol ilə müqavilə imzalayıb.
Ermənistan Daxili İşlər Nazirliyi və Avropa İttifaqının Hüquq Mühafizə Orqanları üzrə Əməkdaşlıq Agentliyi əməkdaşlıq sazişini rəsmiləşdirib.

Departamentin rəis müavini Arpine Sarkisyan aprelin 8-də parlamentin müdafiə və təhlükəsizlik komissiyasının iclasında çıxış edərək imzalanmış sazişin təfərrüatları barədə danışıb.

O, bu sazişin transmilli cinayətkarlıqla, o cümlədən çirkli pulların yuyulması, narkotik vasitələrin qanunsuz dövriyyəsi və aktivlərin oğurluğu, kibercinayətkarlıqla mübarizə və digər məsələlər üzrə geniş əməkdaşlığı nəzərdə tutduğunu vurğulayıb.

Müqavilə çərçivəsində Ermənistanın Europol-da əlaqə zabiti olacaq. Ona agentliyin məxfi məlumat bazasına giriş imkanı veriləcək və onun iqamətgahı Hollandiyada yerləşəcək.

Zabitin vəzifələrinə Ermənistan və Aİ hüquq-mühafizə orqanları arasında daimi dialoqun təmin edilməsi daxildir.