Gürcüstan prezidenti Salome Zurabişvili Emmanuel Makronu payıza planlaşdırılan parlament seçkiləri kampaniyası başlamazdan əvvəl Tbilisiyə gəlməyə çağırıb. Onun sözlərini “La Tribune de Dimanche” qəzeti sitat gətirir.

Gürcüstan prezidenti nəşrlə söhbətində xarici agentlər haqqında qanun layihəsinə etirazlar fonunda Avropa liderlərindən ölkəyə səfər etməyi xahiş edib.

“Emmanuel Makron demək olar ki, 2018-ci ildə seçildiyim andan mənə söz verdi ki, gələcək. O, bunu sentyabrda seçki kampaniyası başlamazdan əvvəl etməlidir. Mən prezident Makrona məktub yazdım və onu mayın 26-da Gürcüstanın Müstəqillik Günündə gözləyirəm”, Zurabişvili deyib.

O, heç kimin Rusiya ilə münaqişə istəmədiyini vurğulayaraq, eyni zamanda “Qafqazı sovet boyunduruğundan xilas etmək” niyyətini ifadə edib. O, bu inkişafı “Avropanın gələcəyi, o cümlədən təhlükəsizliyi üçün çox vacib” adlandırıb.

Xarici agentlər haqqında qanun layihəsi ətrafında mübahisələr fonunda Zurabişvili həmçinin ümid etdiyini bildirib ki, Tbilisi Avropa İttifaqına üzv olmaq üçün namizəd statusundan məhrum edilməyəcək. Eyni zamanda, o qeyd edib ki, qanun layihəsinə veto qoyulması onun yekun taleyinə təsir etməyəcək.

Mayın 14-də Gürcüstan parlamenti xarici agentlər haqqında qanunu üçüncü oxunuşda qəbul edib. Müzakirə hakim “Gürcü Arzusu” partiyasının deputatları ilə müxalifət arasında etirazlar və davalar fonunda baş tutub. Nəticədə 84 deputat lehinə, 30-u əleyhinə səs verib.

Qəbul edilmiş qanuna əsasən, gəlirlərinin 20%-dən çoxu xaricdən gələn bütün qeyri-kommersiya hüquqi şəxsləri və kütləvi informasiya vasitələri xüsusi dövlət reyestrində qeydiyyatdan keçməlidirlər. Bundan əlavə, belə QHT və KİV-lərdən hər il Gürcüstan Maliyyə Nazirliyinə gəlir və xərclər haqqında deklarasiya təqdim etmələri tələb olunacaq.