AzadMedia
Telegram Facebook Twitter Youtube Instagram

“Karvan”da bir karvan malı yananlar kompensasiya ala bilmirlər - GİLEY

  • + A
  • - A
  • 19-10-2017, 12:33

    “Karvan”da bir karvan malı yananlar kompensasiya ala bilmirlər - GİLEY















    Sumqayıt şəhər sakinləri Füzuli Quliyev, Şiralı Əsgərov və Dilavər Abdullayeva “Yeni Müsavat” qəzetinə müraciət edərək, 2013-cü ildə “Karvan” ticarət mərkəzində yanğın baş verdiyi zaman külli miqdarda maddi zərərə düşdüklərini bildiriblər.

    Şikayətçilərin sözlərinə görə, hələ də onlara dəymiş ziyan ödənilməyib və şikayətlərinə də baxılmır. Şikayətçilər bütün lazımi instansiyalara müraciət edib, kömək ala bilməyincə məsələni ictimailəşdirmək qərarına gəliblər.

    Şiralı Əsgərov başlarına gələnləri aşağıdakı kimi anladıb: “Ticarət mərkəzində 2013-cü ildə yanğın baş verən zaman Füzuli Quliyevin 15 kvadratmetrlik mağazasında 55 min manatlıq malı yanıb. Dilabər Abdullayeva isə yanğın zamanı 100 min manat ziyana düşüb. Mənə dəyən zərər isə 170 min manatdır. Hadisə baş verdikdən sonra işlə bağlı istintaq da başladıldı və bu, uzun müddət davam etdi. İstintaq qrupunun rəhbəri Ülvi İsmayılov olub. 9 ay müddətində bütün dəlil və sübutları bizdən aldılar. Dedilər, sizə dəymiş zərər dövlət tərəfindən müəyyənləşdikdən sonra hər kəsə kompensasiya ödəniləcək. 9 aydan sonra isə bazar rəhbərliyinə cinayət işi qaldırdılar. Eyni zamanda təhlükəsizliyə nəzarət edən İsməli Bayramov barəsində də istintaq başladıldı. İsməli Bayramov əslində bazarda mağazalara nəzarət edib, icarə haqlarını yığırdı. İstintaq dövründə isə onu 5 saylı əmrlə yanğın və təhlükəsizlik şöbəsinə qoydular. Avtomatik olaraq hadisədən məsul şəxs də Bayramov oldu. İstintaq dövründə ticarət mərkəzinin direktoru Ağamirzə Əhədov və hazırda ticarət mərkəzinə rəhbərlik edən Kamil Əhədov başda olmaqla, bütün rəhbər şəxslərin səlahiyyətlərinə xitam verildi.

    Orta təhsili belə olmayan İsməli Bayramovu isə həbs etdilər. Onu da qeyd edim ki, İsməli Bayramovun bu əmrlərdən heç xəbəri də olmayıb. İndiyə qədər 6 məhkəmə instansiyası keçmişik və hamısı bizim xeyrimizə olub. 20 may 2016-cı ildə Sumqayıt Apelyasiya Məhkəməsi İsməli Bayramova 5 il 6 ay həbs cəzası verdikdən sonra biz yenidən Ali Məhkəməyə kasasiya şikayəti verdik ki, cəza ağırlaşdırılsın. Lakin iddia təmin olunmadı. İ.Bayramov 8 ay həbsdə qaldıqdan sonra onlar Ali Məhkəməyə kasasiya şikayəti verdilər. Bizə dəyən zərər ödənilmədiyi dönəmdə hakim İnqilab Nəsirov onun cəzasının 4 il 7 ayını məntəqə tipli cəza ilə əvəzlədi. 6 məhkəmə bizim xeyrimizə qərar çıxarıb, üstəgəl də Ali Məhkəmənin özü yenə də bu adama 5 il 6 ay həbs cəzası verib. Axırda isə özü öz qərarını ləğv edib. Bu, necə olur?"

    Zərərçəkmişlər bildiriblər ki, bazarda mağazaları yanan digər şəxslərə yardım edilib: “Onların bir qisminə bazarda yer də verildi və yenidən işlərinə davam etdilər. Bizə isə dəyən zərərin heç 1 manatı da ödənilmədi. 2013-cü ildən bəri 3 nəfərik ki, bütün instansiyaları keçsək də şikayətimiz təmin olunmur. Dəymiş zərər müəyyən qədər ödənilməlidir. Bazarla olan müqaviləmizdə göstərilir ki, hansısa fors-major hal baş verərsə, rəhbərlik yardım etməlidir. Nə zərər ödəndi, nə də hadisəni törətməkdə məsul olan şəxs həbs edildi. Eyni zamanda bazarın rəhbərliyi də cəzalandırılmadı. İndi də çox çətin vəziyyətdəyik. Xeyli borcumuz var. Bizə dəyən zərərin heç olmasa, 50-70 faizinin ödənilməsini istəyirik. Bazar rəhbərliyi deyir ki, mənə hardansa tapşırıq gəlsin, mən də ödənişi edim. Bizimlə bağlı Prezident Administrasiyasından da tapşırıq verilib ki, zərərçəkmişlərə dəyən ziyan ödənilsin. Ancaq xeyri yoxdur, əməl etmirlər. Nə edəcəyimizi bilmirik”.


    www.AzadMedia.az

    Mətndə səhv var? Onu siçanla seçin və Ctrl+Enter düyməsini basın.
    OXŞAR XƏBƏRLƏR

    Köşə
    XƏBƏR LENTİ
    BÜTÜN XƏBƏRLƏR