Akademik Əli Abbasov

44 günlük Vətən müharibəsi Azərbaycanın şanlı tarixinə qızıl hərflərlə yazılmaqla yanaşı, həm də müasir hərb sənəti, siyasi strategiya və informasiya mübarizəsi baxımından dünya miqyasında unikal bir nümunə yaratdı. Ölkə Prezidenti, Müzəffər Ali Baş Komandan İlham Əliyevin rəhbərliyi ilə aparılan bu mübarizə yalnız döyüş meydanında deyil, həm də diplomatik və informasiya cəbhələrində misli görünməmiş bir qələbə ilə nəticələndi.

İşğal altında olan torpaqların azad edilməsi Azərbaycanın qarşısında duran əsas strateji vəzifə idi. Lakin bu məqsədə çatmaq üçün təkcə güclü ordu və müasir silahlar kifayət etmirdi. Beynəlxalq ictimaiyyətə münaqişənin əsl mahiyyətini anlatmaq, Ermənistanın uzun illər ərzində formalaşdırmağa çalışdığı yanlış təsəvvürləri dağıtmaq, Azərbaycanın haqlı mövqeyini dünya mediasının diqqətinə çatdırmaq da vacib idi. Çünki Azərbaycan yalnız ərazilərini azad etmək uğrunda deyil, həm də həqiqət uğrunda mübarizə aparırdı.

Müharibənin ilk günlərindən etibarən Azərbaycan əsaslı və güclü informasiya blokadası ilə üz-üzə qalmışdı. Dünyanın aparıcı media qurumları erməni lobbisinin təsiri altında hadisələri birtərəfli, qərəzli və təhrif olunmuş şəkildə işıqlandırır, Azərbaycanı təcavüzkar kimi qələmə verməyə çalışırdılar. Məhz bu çətin məqamda Prezident İlham Əliyev dünyanın aparıcı televiziya kanallarına və xəbər agentliklərinə verdiyi 30-dan çox dərin, məntiqli və kəsərli müsahibəsi ilə bu informasiya divarını yarıb keçdi. Dövlət başçısı hər bir müsahibəsində tarixi sənədlərə, beynəlxalq hüquq norma və prinsiplərinə, BMT Təhlükəsizlik Şurasının icra olunmayan 4 qətnaməsinə əsaslanaraq erməni təbliğatının bütün yalanlarını faktlarla darmadağın etdi. Jurnalistlərin qərəzli və təxribat xarakterli suallarına sərrast, təmkinli və dəmir məntiqlə verilən cavablar Azərbaycanın haqlı səsinin dünyaya çatdırılmasında həlledici rol oynadı.

Eyni zamanda, döyüşlərin qızğın vaxtında müxtəlif beynəlxalq mərkəzlərdən edilən siyasi təzyiqlərə və birtərəfli atəşkəs çağırışlarına baxmayaraq, Müzəffər Ali Baş Komandan sarsılmaz siyasi iradə nümayiş etdirdi. Azərbaycan tərəfi öz prinsipial mövqeyindən geri çəkilməyərək düşmənin torpaqlarımızdan çıxması üçün aydın şərtlər irəli sürdü. Döyüş meydanında qazanılan zəfərlər diplomatik masada Azərbaycanın mövqeyini daha da gücləndirdi. Ordumuzun rəşadəti ilə dövlət başçısının siyasi bəyanatları bir-birini tamamlayaraq "Dəmir yumruq" konseptini yaratdı — bu, yalnız hərbi gücün deyil, həm də xalqın, ordunun və rəhbərliyin sarsılmaz birliyinin simvoluna çevrildi.

Azərbaycan dövləti təkbaşına BMT Təhlükəsizlik Şurasının qətnamələrinin icrasını təmin edərək beynəlxalq hüququn işlək olduğunu əyani şəkildə nümayiş etdirdi. Bu tarixi qələbə Cənubi Qafqazda uzunmüddətli sabitlik, inkişaf və əməkdaşlıq üçün yeni reallıqlar yaratdı, ölkəmizin regiondakı mutləq lider və söz sahibi statusunu birmənalı olaraq möhkəmləndirdi. 44 günlük Vətən müharibəsi sübut etdi ki, güclü ordu ilə yanaşı, haqlı ideologiya, dəmir siyasi iradə və düzgün qurulmuş informasiya strategiyası birləşdikdə hər hansı bir xalq öz tarixi ədalətini bərpa etməyə qadirdir.