Azərbaycan Prezidentinin köməkçisi Hikmət Hacıyev CNN telekanalında çıxış edərək Azərbaycanın öz suverenliyini müdafiə etmək hüququnu xatırladıb. O əlavə edib ki, Qarabağdakı erməni əsgərləri bütün region üçün təhlükə yaradır.
Azərbaycan prezidentinin köməkçisi, Prezident Administrasiyasının xarici siyasət şöbəsinin müdiri Hikmət Hacıyev CNN telekanalına müsahibəsində vurğulayıb ki, hər bir dövlət kimi Azərbaycanın da öz suverenliyini müdafiə etmək hüququ var.

O xatırladıb: Bakı aydın şəkildə bildirdi ki, Qarabağdakı erməni qanunsuz silahlı birləşmələri təslim olarsa, antiterror əməliyyatı başa çatacaq.

"Dünyanın istənilən ölkəsi kimi Azərbaycanın da öz suverenliyini müdafiə etmək hüququ var. Azərbaycan dəfələrlə bəyan edib ki, orada 10 min erməni əsgər var. Bu, təkcə Azərbaycan üçün deyil, bütün region üçün təhlükə idi. Amma indi bu, belədir. Biz Qarabağın erməni sakinlərinin Azərbaycan cəmiyyətinə reinteqrasiyası, onların Azərbaycan Konstitusiyasına uyğun olaraq hüquq və təhlükəsizliyinin təmin edilməsi, eləcə də “boz zona”nın ləğvi prosesinin başlanmasını səbirsizliklə gözləyirik. Azərbaycanda 30 ildir mövcud olan bu “boz zona” 30 illik erməni işğalının qalığıdır”.
Prezidentin köməkçisi vurğulayıb ki, yerli antiterror tədbirləri zamanı Qarabağda dinc sakinlər hədəf olmayıb. Əksinə, Azərbaycan Silahlı Qüvvələri dəqiq idarə olunan hərbi sursatlardan istifadə edib. Azərbaycan hərbçiləri hədəfləri zərərsizləşdirərkən özünü çox seçici və dəqiq aparıb.
Hikmət Hacıyev qeyd edib ki, bütün mülki əhaliyə əvvəlcədən SMS vasitəsilə hərbi obyektlərə yaxınlaşmamaq barədə məlumat verilib.