Azərbaycan hakimiyyəti silahlarını təhvil verən Dağlıq Qarabağ sakinləri üçün amnistiya imkanlarını nəzərdən keçirir. Azadmedia az xəbər verir ki bunu “Reuters” agentliyinə açıqlamasında Azərbaycan Prezidentinin Xarici siyasət məsələləri üzrə köməkçisi Hikmət Hacıyev deyib.

“Hətta keçmiş hərbi döyüşçülərə münasibətdə belə, onları bu şəkildə təsnif etmək olarsa... biz amnistiya imkanlarını nəzərdən keçiririk və ya amnistiyadan danışırıq”, - Hacıyev bildirib.

Onun sözlərinə görə, Azərbaycan rəhbərliyi Qarabağ silahlı birləşmələrinin silahı yerə qoymuş üzvlərini tərk etməyə icazə verəcək.

Hacıyev əlavə edib ki, hazırda müəyyən qruplar və zabitlər Bakının şərtlərini qəbul etməyəcəklərini və müqaviməti davam etdirəcəklərini açıq şəkildə bəyan ediblər.

Sentyabrın 19-da Azərbaycan Müdafiə Nazirliyi Dağlıq Qarabağda lokal antiterror əməliyyatına başlandığını elan edib. Əməliyyatın məqsədinin “genişmiqyaslı təxribatların” qarşısının alınması, o cümlədən Ermənistan ordusunun bölmələrinin tərksilah edilərək bölgədən çıxarılması olduğu bildirilib.

Öz növbəsində, Ermənistan Müdafiə Nazirliyi Azərbaycanın Ermənistan qoşunlarının hələ də Dağlıq Qarabağ ərazisində qalması ilə bağlı bəyanatlarını rədd edib.

Rusiya Federasiyasının Müdafiə Nazirliyi münaqişə tərəflərini dərhal atəşi dayandırmağa və danışıqları davam etdirməyə çağırıb.