Beynəlxalq Atom Enerjisi Agentliyi (MAQATE) ötən həftə İranda 84% zənginləşdirilmiş uranı aşkar edib. Azadmedia.az xəbər verir ki, bu barədə mənbələr Bloomberg-ə bildiriblər. Bu, nüvə silahı yaratmaq üçün tələb olunan səviyyədən 6% aşağıdır. Tehranın özü əvvəllər beynəlxalq müşahidəçilərə bildirib ki, onun sentrifuqaları uranı 60%-ə qədər zənginləşdirməyə imkan verir.

MAQATE müfəttişləri İranın bu səviyyəyə qədər zənginləşdirilmiş uranı bilərəkdən istehsal edib-etmədiyini araşdıracaq. Bloomberg-in məlumatına görə, beynəlxalq təşkilat bir ay ərzində ikinci dəfə "şübhəli zənginləşdirmə ilə bağlı fəaliyyət" müşahidə edib.

MAQATE-nin nümayəndə heyəti yanvar ayında Fordo obyektində elan edilməmiş təftişdən sonra İranı uranı 60%-ə qədər zənginləşdirən IR-6 sentrifuqalarının iki kaskadının işində elan olunmamış dəyişikliyə görə tənqid edib. İranın Atom Enerjisi Təşkilatının sözçüsü Behruz Kamalvəndi MAQATE-nin hesabatının köhnəlmiş məlumatlara əsaslandığını bildirib.