Türkiyə və Rusiya prezidentləri Tayyib Ərdoğan və Vladimir Putin arasında mümkün görüş ərəfəsində Türkiyə Ukrayna, ABŞ və Aİ ilə taxıl sazişi üzrə təmasları gücləndirib. Azadmedia.az xəbər verir ki, bu barədə TASS-a diplomatik mənbə məlumat verib.

"Türkiyə taxıl müqaviləsi ilə bağlı Ukrayna, ABŞ və Aİ ilə çoxtərəfli diplomatik işi gücləndirib. İşlər Xarici İşlər Nazirliyi, Müdafiə Nazirliyi və Ticarət Nazirliyi vasitəsilə həyata keçirilir. Danışıqlar ərəfəsində Ərdoğan və Putin arasında taxıl təşəbbüsünün həyata keçirilməsi ilə bağlı problemlərin aradan qaldırılması istiqamətində işlər intensivləşib”, - mənbə bildirib.

Bu arada “Milliyet” qəzeti Putinin Türkiyəyə səfərinin “yaxın günlərdə” baş tutacağını iddia edir. Eyni zamanda “Ahaber” telekanalı qeyd edir ki, Rusiya lideri respublikaya gəlməsə, o zaman Ərdoğan Rusiya Federasiyasına səfər edəcək.

Avqustun 3-də Rusiya dövlət başçısının mətbuat katibi Dmitri Peskov Rusiya və Türkiyə prezidentlərinin görüşünün yeri və dəqiq tarixinin diplomatik kanallar vasitəsilə razılaşdırılacağını bildirib. Bir gün əvvəl Peskov vurğulamışdı ki, “görüş yeri müzakirə olunacaq, bu, mütləq Türkiyə deyil”.