Toyota pikap yük maşınlarının reklamı ekoloji səbəblərə görə Britaniya Reklam Standartları Təşkilatı (ASA) tərəfindən qadağan edildi. Azadmedia.az xəbər verir ki, reklamda çay yatağı ilə hərəkət edən avtomobillər yer alırdı. Bu barədə TASS Financial Times (FT) nəşrinə istinadən xəbər verir.

Qeyd olunur ki, elanda düzənlikdə bir-birinin ardınca hərəkət edən “Toyota Hilux” markalı avtomobillər çayın məcrasını keçərək daha sonra yola çıxıblar. ASA hesab edib ki, reklamda avtomobilin ətraf mühitə mənfi təsirini nəzərə almadan təbii ekosistemlər vasitəsilə idarə olunması göstərilib.

Toyota Motor izah etdi ki, reklam yalnız avtomobilin imkanlarını nümayiş etdirir və heç bir ağlabatan tamaşaçı videonu kənddə məsuliyyətsiz maşın sürməyə və ətraf mühitə zərər verməyə çağırış kimi qəbul etməyəcək.

Bundan əvvəl məlum olmuşdu ki, Toyota Motor əyləc sisteminin təmiri üçün 580 min avtomobili geri çağıracaq. Beləliklə, bu nəqliyyat vasitələrinin pedallarında boltlar səhv sıxılmış ola bilər ki, bu da ən pis halda əyləclərin sıradan çıxmasına səbəb ola bilər. Bu günə qədər nasazlıq səbəbindən hər hansı insidentlə bağlı məlumat verilməyib. Əyləc sisteminin təmiri üçün hansı avtomobillərin geri çağırılacağı barədə heç bir məlumat yoxdur.