28 noyabr tarixində İcbari Tibbi Sığorta üzrə Dövlət Agentliyi (Agentlik) və Tibbi Ərazi Bölmələrini İdarəetmə Birliyi (TƏBİB) tərəfindən media nümayəndələri üçün Şəmkir Rayon Mərkəzi Xəstəxanasına media-tur təşkil olunub.

Tədbirdə çıxış edən Agentliyin Tibbi planlama departamentinin rəhbəri Hikmət İbrahimli bildirib ki, xəstəxanada mütəmadi şəkildə aparılan monitorinqlərin əsas məqsədi tibbi xidmətlərin keyfiyyətini daha da yüksəltməkdir. Onun sözlərinə görə, yalnız bu il ərzində tibb müəssisəsində 9 monitorinq həyata keçirilib.

Monitorinqlər zamanı infrastrukturun vəziyyəti, tibbi avadanlıqların fəaliyyəti, pasiyentlərin qəbulu və qeydiyyat proseslərinin təşkili kimi əsas istiqamətlər qiymətləndirilir. Hikmət İbrahimli qeyd edib ki, Şəmkir Rayon Mərkəzi Xəstəxanasında Xidmətlər Zərfinə daxil olan əsas tibbi sahələr üzrə təminat mövcuddur. Bu isə rayon sakinlərinə ehtiyac duyduqları tibbi xidmətləri yerindəcə almağa imkan verir və onların əlavə xərc və vaxt itirməsinin qarşısını alır.

Rəsmi məlumatlara görə, ötən ildən bu ilin iyul ayına qədər xəstəxanada 1 083 258 tibbi xidmət göstərilib. Məhz icbari tibbi sığortanın tətbiqi sayəsində bölgə əhalisi bu xidmətlərdən əlavə ödəniş etmədən yararlanıb.

Agentlik nümayəndələri bildiriblər ki, monitorinq mexanizmi gələcəkdə də davam etdirilərək tibbi xidmətlərin keyfiyyətinin yüksəldilməsinə xidmət edəcək.