Bu gün Şəmkir Rayon Mərkəzi Xəstəxanasında keçirilən media-tur zamanı tibb müəssisəsində son illər aparılan yeniliklər və icbari tibbi sığortanın tətbiqinin nəticələri barədə ətraflı məlumat verilib. Xəstəxananın direktoru Samir Namazov bildirib ki, icbari tibbi sığortanın tətbiqi səhiyyə xidmətlərinin əlçatanlığını artırmaqla yanaşı, müəssisənin maddi-texniki bazasının da əhəmiyyətli dərəcədə güclənməsinə səbəb olub.

Onun sözlərinə görə, hazırda xəstəxanada müxtəlif tibbi profillər üzrə 15 şöbə fəaliyyət göstərir. Vətəndaşlar həm ambulator, həm də stasionar müayinə və müalicə xidmətlərindən yararlana bilirlər. Müəssisə 229 çarpayı ilə stasionar xidmət göstərmək imkanına malikdir.

Samir Namazov əlavə edib ki, icbari tibbi sığortanın tətbiqindən sonra xəstəxanaya 30 adda yeni tibbi avadanlıq gətirilib. Müasir KT, MRT, qastroskop, elektroensefaloqrafiya, exokardioqrafiya, otoskop, oftalmoskop, laparoskop və digər diaqnostik cihazlar xəstəliklərin vaxtında aşkarlanmasında operativlik və dəqiqlik təmin edir.

Bundan əlavə, xəstəxanada tam şəkildə yenidən qurulan Hemodializ şöbəsi istifadəyə verilib və şöbə hazırda üç növbə üzrə fəaliyyət göstərərək dializ xidmətinə ehtiyacı olan pasiyentlərin tələbatını tam şəkildə qarşılayır.

Media-tur çərçivəsində nümayəndələr xəstəxananın yeni avadanlıqlarla təchiz olunmuş şöbələrini, müasir laboratoriya və diaqnostika imkanlarını yerindəcə izləyiblər.