Elnarə Akimova Şimali Kipr Türk Cümhuriyyətinin paytaxtı Lefkoşa şəhərində yerləşən Atatürk Öğretmen Akademiyasında keçirilən “Türk Dünyası Uşaq Ədəbiyyatı Seminarı”nın açılış mərasimində çıxış edib.

Seminar Atatürk Kültür, Dil ve Tarih Yüksek Kurumu tərəfindən təşkil olunub və müxtəlif türk dövlətlərini təmsil edən alimləri, yazıçıları və ədəbiyyat araşdırmaçılarını bir araya gətirib.

Çıxışı zamanı deputat uşaq ədəbiyyatının milli kimliyin formalaşması, dilin qorunması və ortaq mədəni yaddaşın inkişafındakı mühüm rolundan bəhs edib. O, bu sahədə yeni təşəbbüslərin və əməkdaşlıq imkanlarının genişləndirilməsinin vacibliyini vurğulayıb.

Deputat bildirib ki, belə beynəlxalq platformalar türk dünyasında ortaq ədəbi düşüncənin güclənməsinə, yeni əməkdaşlıqların yaranmasına və daha keyfiyyətli uşaq ədəbiyyatı nümunələrinin formalaşmasına mühüm töhfə verir.