Honda 70 ildən sonra ilk dəfə illik zərər açıqlayıb. Yaponiyanın avtomobil nəhəngi 2026-cı ilin martında başa çatan maliyyə ili üzrə 423 milyard yen (təxminən 2,68 milyard dollar) həcmində əməliyyat zərəri etdiyini bildirib.

Şirkətin açıqlamasına görə, elektrik avtomobillərinə qoyulan böyük investisiyalar gözlənilən nəticəni verməyib. Elektrikli avtomobillərə tələbat proqnozlaşdırıldığından daha zəif olub və bu da Honda-nın maliyyə göstəricilərinə ciddi təsir göstərib.
Honda bəzi elektrik avtomobili və batareya istehsalı layihələrindən imtina etdiyini açıqlayıb. Şirkət, həmçinin xərcləri azaltmaq üçün daha ucuz istehsal imkanlarına malik olan Çindən ehtiyat hissələri almağa üstünlük verəcəyini bildirib.

Şirkət ABŞ siyasətindəki dəyişikliklərin də zərərləri artırdığını vurğulayıb. ABŞ prezidenti Donald Trump tərəfindən elektrik avtomobilləri üçün tətbiq olunan vergi güzəştlərinin ləğv edilməsi və idxal avtomobillərinə tariflərin tətbiqi satışlara mənfi təsir göstərib.

Honda rəhbəri Toshihiro Mibe bildirib ki, şirkət artıq strategiyasını dəyişir və diqqəti daha çox motosiklet biznesinə, maliyyə xidmətlərinə və hibrid avtomobillərə yönəldəcək.

Şirkət Şimali Amerika, Yaponiya və Hindistanı gələcək inkişaf üçün əsas bazarlar adlandırıb. Bununla yanaşı, Honda elektrik avtomobilləri ilə bağlı zərərlərin gələn maliyyə ilində 512 milyard yenə çata biləcəyini proqnozlaşdırır.