Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Mədəniyyətin və Milli Ənənələrin Təbliği” İctimai Birliyinin həyata keçirdiyi “Qərbi Azərbaycanın Maarif İrsi: Unudulmaz Məktəblər” layihəsi çərçivəsində Azərbaycan Dövlət Pedaqoji Kollecində növbəti maarifləndirici tədbir təşkil olunub.

Tədbirdə layihə rəhbəri, İctimai Birliyin sədri Etibar Məmmədov çıxış edərək layihənin məqsəd və vəzifələri, Qərbi Azərbaycanın zəngin maarifçilik tarixi, burada fəaliyyət göstərmiş tarixi məktəblər və təhsil ənənələrinin qorunub gələcək nəsillərə çatdırılmasının əhəmiyyəti barədə tələbələrə ətraflı məlumat verib.

Tədbir çərçivəsində layihə üzrə hazırlanmış 10 qısa video-podkast (Shorts) tələbələrə təqdim olunub. Sosial şəbəkələrdə yayımlanmaq üçün nəzərdə tutulan videoçarxlarda Qərbi Azərbaycanın maarifçilik irsi, tarixi məktəbləri və xalqımızın təhsil ənənələri müxtəlif mövzular üzrə işıqlandırılıb.

Tələbələr təqdim olunan videoçarxları izləyərək layihənin mövzusu ilə yaxından tanış olublar. Daha sonra mövzu ətrafında maarifləndirici müzakirələr aparılıb, iştirakçılara Qərbi Azərbaycanın təhsil tarixinin öyrənilməsi və təbliğinin əhəmiyyəti barədə əlavə məlumatlar verilib.

Qeyd olunub ki, müasir rəqəmsal platformalar vasitəsilə hazırlanmış qısa video materialların geniş auditoriyaya çatdırılması tarixi-mədəni irsin, xüsusilə də maarifçilik ənənələrinin gənclər arasında təbliği baxımından mühüm əhəmiyyət daşıyır.

Layihənin əsas məqsədi Qərbi Azərbaycanın tarixi maarifçilik irsinin araşdırılması, tarixi məktəblər haqqında məlumatların toplanması və ictimaiyyətə çatdırılması, milli-mədəni yaddaşın qorunması və gənc nəslin bu irs barədə məlumatlandırılmasıdır.

Layihə üç ay müddətində həyata keçirilir. Layihənin rəhbəri Etibar Məmmədovdur.