ABŞ Ədliyyə Nazirliyi prezident Donald Trump və ailə üzvlərinin əvvəlki illərə aid vergi bəyannamələrinin yoxlanılmasını məhdudlaşdırıb. Qərar Trampın ABŞ Vergi Xidməti — Internal Revenue Service (IRS) əleyhinə qaldırdığı iddianın nizamlanması çərçivəsində qəbul edilib. İddia onun vergi məlumatlarının sızdırılması ilə bağlı idi.

CNN-in məlumatına görə, Tramp ilkin mərhələdə IRS-dən 10 milyard dollar kompensasiya tələb edib. Razılaşmanın ilk variantında Ədliyyə Nazirliyi əvvəlki administrasiya dövründə qanunsuz təqiblərə məruz qaldıqlarını bildirən Tramp tərəfdarlarına ödəniş etmək üçün 1,8 milyard dollarlıq fond yaradıldığını açıqlayıb. Trampın özünə isə maliyyə kompensasiyası olmadan rəsmi üzrxahlıq təqdim ediləcəyi qeyd olunub.

Daha sonra Ədliyyə Nazirliyinin saytında baş prokuror səlahiyyətlərini icra edən Todd Blanche tərəfindən imzalanmış əlavə sənəd yayımlanıb. Sənəddə ABŞ hökumətinin Trampa qarşı əvvəlki vergi iddialarından imtina etdiyi və gələcəkdə analoji iddiaların qaldırılmasının mümkün olmayacağı bildirilib. Məhdudiyyətin yalnız keçmiş vergi dövrlərinə aid olduğu, gələcək bəyannamələrə şamil edilmədiyi vurğulanıb.

Ədliyyə Nazirliyi mətbuat açıqlaması ilə razılaşma sənədindəki fərqlərlə bağlı şərh verməyib. Demokrat siyasətçilər, o cümlədən konqresmen Richard Neal vergi yoxlamalarının qadağan edilməsini “korrupsiya” adlandırıblar.

Tramp daha əvvəl davam edən audit prosesini əsas gətirərək vergi bəyannamələrini ictimaiyyətə açıqlamırdı. O, 1970-ci illərdən bəri bu məlumatları açıqlamaqdan imtina edən ilk ABŞ prezidenti olmuşdu.

İddia 2026-cı ilin yanvarında Trampın vergi məlumatlarının mediaya sızdırılmasından sonra qaldırılmışdı. Məlumatların IRS-in keçmiş əməkdaşı Charles Littlejohn tərəfindən ötürüldüyü bildirilir. O, sonradan məlumatların qanunsuz açıqlanmasına görə məhkum edilib.