Polşa 2022-ci ilin fevral ayından etibarən Ukraynaya 16,4 milyard zlotı (təxminən 4,5 milyard ABŞ dolları) dəyərində silah və hərbi texnika təhvil verib.

Bu barədə Polşanın müdafiə naziri Vladislav Kosinyak-Kamış jurnalistlərə açıqlamasında bildirib.

Nazirin təqdim etdiyi məlumata görə, hərbi yardımın əsas hissəsi – 14,9 milyard zlotı (təxminən 4,1 milyard dollar) dəyərində vəsait 2022–2023-cü illərdə ölkədə hakimiyyətdə olan "Hüquq və Ədalət" Partiyasının hökuməti dövründə Ukraynaya göndərilib.

O qeyd edib ki, hazırkı Polşa hökuməti isə Kiyevə 1,5 milyard zlotı (təxminən 400 milyon dollar) həcmində hərbi yardım göstərib.

Vladislav Kosinyak-Kamış həmçinin Polşanın Ukraynaya Patriot hava hücumundan müdafiə sistemləri üçün raketlər verdiyini də təsdiqləyib.

Nazirin sözlərinə görə, bu qərar NATO-nun baş katibinin və ABŞ Silahlı Qüvvələrinin Avropadakı komandanlığının müraciəti əsasında, Patriot sistemlərindən istifadə edən ölkələrlə aparılan məsləhətləşmələrdən sonra qəbul edilib.

O vurğulayıb ki, Ukraynaya ötürülən raketlərin sayı Polşanın müdafiə imkanlarını zəiflətmir və ölkənin hava hücumundan müdafiə potensialına mənfi təsir göstərmir.