Tayvan hakimiyyəti "Bavi" supertayfununun adaya yaxınlaşması ilə əlaqədar paytaxt Taybey də daxil olmaqla bir sıra iri şəhərlərdə və rayonlarda məktəblərin, eləcə də dövlət idarələrinin fəaliyyətini dayandırıb.

Focus Taiwan portalının məlumatına görə, qərar Taybey, Yeni Taybey, Czilun, Taoyuan, Szinçu, Tayçjun şəhərləri, həmçinin adanın şimal, şimal-şərq və şərq bölgələrini əhatə edir.

Bundan əvvəl Tayvanın Mərkəzi Meteorologiya İdarəsi (CWA) "Bavi" supertayfunu ilə bağlı rəsmi xəbərdarlıq yayıb. Sinoptiklərin proqnozuna əsasən, tayfun iyulun 10-u axşam saatlarında adanın şimal hissəsinə yaxınlaşacaq.

Məlumata görə, tayfunun mərkəzi səhər saatlarında Tayvandan təxminən 700 kilometr cənub-şərqdə yerləşib və saatda 25 kilometr sürətlə şimal-qərb istiqamətində hərəkət edib. Fırtınanın təsir radiusu isə 380 kilometr təşkil edir.

Meteoroloqlar bildirirlər ki, "Bavi"nin təsiri cümə axşamından bazar gününədək davam edəcək. Tayfunun gətirdiyi küləyin sürətinin 50 metr/saniyəyə çatacağı gözlənilir.

Bundan əlavə, Tayvanın şimalındakı dağlıq ərazilərdə 900 millimetrədək, düzənlik rayonlarda isə 500–700 millimetr yağıntının düşəcəyi proqnozlaşdırılır.

Hakimiyyət orqanları Pindun, İlan, Hualyan və Taydun sahillərində dalğaların hündürlüyünün 6 metrdən artıq ola biləcəyi barədə xəbərdarlıq edib. Bütün gəmilərə təhlükə aradan qalxana qədər dənizə çıxmamaq tövsiyə olunub.