İspaniyada fövqəladə vəziyyət ləğv edilib, meşə yanğınları isə hələ də davam edir

İspaniyada meşə yanğınları ilə əlaqədar tətbiq olunan milli fövqəladə vəziyyət rejimi ləğv edilsə də, ölkənin müxtəlif bölgələrində onlarla yanğın ocağı hələ də nəzarət altına alınmayıb.
İspaniyanın Baş naziri Pedro Sançes Avila əyalətinin Navaluenqa bələdiyyəsində yerləşən fövqəladə hallar üzrə operativ qərargaha səfəri zamanı bildirib ki, yanğının miqyası nəzərə alınmaqla görülən tədbirlər effektiv olub. O, bununla əlaqədar milli fövqəladə vəziyyət rejiminin başa çatdığını elan edib.

Bununla belə, ölkədə yanğın təhlükəsi hələ də yüksək olaraq qalır. Kastiliya və Leon muxtar bölgəsində 10 yanğın ocağı aktivdir. Onlardan üçü – Samora əyalətinin Fermoselye, eləcə də Leon əyalətinin Veqelyin və Valdelalobe yaşayış məntəqələrində qeydə alınan yanğınlar ən yüksək təhlükə səviyyəsinə malikdir.

Ən mürəkkəb vəziyyət Samora əyalətində yaşanır. Burada Aribes-del-Duero təbiət parkı ərazisində başlayan yanğının söndürülməsi üçün 50-dən çox quru və hava texnikası, həmçinin İspaniyanın Hərbi Fövqəladə Hallar Xidmətinin (UME) bölmələri cəlb olunub.

Son 24 saat ərzində alov təxminən 11 min hektar meşə sahəsini məhv edib. Təhlükəli ərazilərdən 14 yaşayış məntəqəsinin 800-dən çox sakini təxliyə olunub. Fermoselye və Farise şəhərlərində sakinlərin hərəkətinə məhdudiyyət tətbiq edilib.

Xilasetmə xidmətləri günün ikinci yarısında küləyin güclənəcəyini və yüksək temperaturun davam edəcəyini bildirərək, bunun yanğınların söndürülməsini daha da çətinləşdirə biləcəyini qeyd ediblər.

Eyni zamanda, Avila, Madrid və Toledo bölgələrində lokallaşdırılmış yanğın ocaqlarına nəzarət davam etdirilir. Fövqəladə xidmətlər həmçinin ikinci güclü istilik dalğası fonunda Kastelyon və Tarraqona da daxil olmaqla digər bölgələrdə vəziyyəti yaxından izləyirlər.