Fransadan Böyük Britaniyaya keçmək istəyən miqrantların olduğu qayıqda baş verən yanğın nəticəsində 157 nəfər xilas edilib.

BBC News-un məlumatına görə, hadisə La-Manş boğazında qeydə alınıb. Fransa La-Manş və Şimal dənizi Dəniz Prefekturasının bildirdiyinə əsasən, qayıq bazar ertəsi axşam Fransa sahillərindən yola düşüb. Mühərrikdə yaranan yanğından sonra qayığın vəziyyəti qısa müddətdə ağırlaşıb.

Xilasetmə əməliyyatı zamanı ümumilikdə 157 nəfər təhlükəsiz şəkildə təxliyə olunaraq Fransanın Bulon-sür-Mer limanına çatdırılıb. Hadisə nəticəsində ölən və ya xəsarət alan olmadığı bildirilib.

Fransa rəsmiləri qeyd ediblər ki, gecə saatlarında qayıqdakı beş nəfər xilasedicilərin yardımını qəbul etsə də, digər sərnişinlər Böyük Britaniyaya səyahətlərini davam etdirmək istədikləri üçün təxliyədən imtina ediblər.

Dəniz Prefekturası bildirib ki, bu cür qayıqların konstruksiyasının zəif olması səbəbindən əlavə müdaxilə riskli hesab edilib.

Hadisə yerinə Fransa və Böyük Britaniyanın xilasedici gəmiləri cəlb olunub. Fransa gəmiləri 103, Britaniya xilasediciləri isə daha 54 nəfəri xilas ediblər.

Böyük Britaniya hökuməti insidentin La-Manş üzərindən qanunsuz keçidlərin nə qədər təhlükəli olduğunu bir daha nümayiş etdirdiyini vurğulayaraq, qeyri-qanuni miqrasiyaya qarşı mübarizədə Fransa ilə əməkdaşlığın davam etdiriləcəyini açıqlayıb.

Hadisə Böyük Britaniyanın Baş naziri Endi Bernhemin kiçik qayıqlarla ölkəyə qanunsuz gələnlərin sayının azaldılması istiqamətində hökumətin qətiyyətlə çalışacağını bəyan etməsindən bir gün sonra baş verib.

Britaniya hakimiyyətinin məlumatına görə, ilin əvvəlindən bəri La-Manş boğazını kiçik qayıqlarla keçərək ölkəyə çatanların sayı ötən ilin eyni dövrü ilə müqayisədə təxminən 43 faiz azalıb. Bununla belə, ötən il bu marşrut üzrə keçidlərin sayı rekord həddə çatmışdı. Bu ilin ən intensiv günü isə ötən həftənin çərşənbəsi olub. Həmin gün Böyük Britaniyaya 752 nəfər kiçik qayıqlarla çatıb.

Xatırladaq ki, bu ilin aprel ayında Böyük Britaniya və Fransa La-Manş boğazında qanunsuz miqrasiyaya qarşı mübarizə məqsədilə dəyəri 662 milyon funt sterlinq olan üçillik əməkdaşlıq sazişi imzalayıblar. Saziş çərçivəsində Fransa sahillərində patrulların gücləndirilməsi, pilotsuz uçuş aparatları və helikopterlərdən istifadə nəzərdə tutulur.