Şotlandiyada yüzilliklərdir davam edən şimal sümsükquşlarının (gannet) balalarının ovu bu il ilk dəfə olaraq keçirilməyəcək. Ölkə hakimiyyəti quş populyasiyasının qorunması məqsədilə uzaq Sula Sgeir adasında ov üçün icazə verməyib.

"Men of Ness" adlı ovçu qrupu ənənəyə uyğun olaraq 2 minə qədər gənc sümsükquşunun ovlanmasına icazə istəmişdi. Lakin Şotlandiyanın təbiəti mühafizə qurumu **NatureScot** son elmi araşdırmalara əsaslanaraq bildirib ki, 2026-cı ildə belə ov quşların sayına mənfi təsir göstərə bilər.

"Guga Hunt" adı ilə tanınan bu ənənə ilk dəfə 1549-cu ildə qeydə alınıb. Hər il ovçular Şotlandiyanın şimal-qərb sahillərindən təxminən 64 kilometr uzaqlıqda yerləşən, yaşayış olmayan Sula Sgeir adasına dəniz yolu ilə gedərək sümsükquşlarının balalarını qayalardan xüsusi dirəklərin köməyi ilə götürürdülər. Daha sonra quşlar kəsilir, duzlanır və "quqa" adlanan ənənəvi yemək kimi uzun müddət bişirilərək kartofla süfrəyə verilirdi.

NatureScot bildirib ki, bu ov uzun illərdir heyvan hüquqları müdafiəçilərinin etirazına səbəb olur. Bununla belə, bu il verilən qərarın əsas səbəbi ictimai təzyiq deyil. Qurumun məlumatına görə, 2021–2023-cü illərdə yayılan quş qripi nəticəsində sümsükquşlarının populyasiyası ciddi zərər görüb və hazırkı şəraitdə ovun davam etdirilməsi riskli hesab olunur.

Yerli sakinlər isə qərarı məyusluqla qarşılayıblar. Onların sözlərinə görə, təxminən 400 ildir davam edən bu ənənə indiyədək davamlı və təbiətə zərər verməyən fəaliyyət kimi qiymətləndirilib.

Tarixən Şotlandiyanın ucqar və sərt iqlimə malik bölgələrində yaşayan insanlar üçün vəhşi dəniz quşlarının əti mühüm qida mənbələrindən biri olub. Yerli əhali yalnız sümsükquşlarını deyil, həmçinin digər dəniz quşlarının yumurtalarından və yağından da istifadə edirdi.