Köpəkbalıqlarının qohumlarını tanıya bildiyi və onlarla daha çox vaxt keçirməyə üstünlük verdiyi müəyyən edilib. Bu nəticə alimlərin Fici adalarındakı Shark Reef dəniz qoruğunda öküz köpəkbalıqları (bull shark) üzərində altı il davam edən müşahidələri əsasında əldə olunub. Tədqiqatın nəticələri Ecology and Evolution elmi jurnalında dərc olunub.

Ekseter Universiteti, Fici Köpəkbalığı Laboratoriyası və Lankaster Universitetinin tədqiqatçıları heyvanların genetik məlumatlarını uzunmüddətli davranış müşahidələri ilə müqayisə ediblər. Məlum olub ki, populyasiyadakı köpəkbalıqlarının əksəriyyəti bir-biri ilə yaxın qohum olmasa da, qohum fərdlərin birlikdə hərəkət etmə ehtimalı digər fərdlərlə müqayisədə daha yüksəkdir.

Tədqiqat müəllifləri qohumluğun sosial davranışa təsirini ifadə etmək üçün "kinfluence" terminini irəli sürüblər. Bu söz ingilis dilindəki "kin" (qohumluq) və "influence" (təsir) sözlərinin birləşməsindən yaranıb.

Alimlər köpəkbalıqları arasındakı sosial əlaqələri iki əsas meyar üzrə qiymətləndiriblər: onların bir-birinin yaxınlığında nə qədər tez-tez olması və paralel üzmə, bir-birini izləmə və ya eyni anda eyni istiqamətdə hərəkət etmə kimi ortaq davranışlar nümayiş etdirməsi.

Araşdırma göstərib ki, qohumluğun təsiri xüsusilə erkək köpəkbalıqları arasında daha aydın hiss olunur. Daha əvvəl aparılmış tədqiqatlarda onların sosial tərəfdaş seçərkən cins, yaş və bədən ölçüsünə üstünlük verdiyi məlum idi. Yeni araşdırma isə qohumluğun da sosial münasibətləri formalaşdıran mühüm amillərdən biri olduğunu ortaya qoyub.

Tədqiqatın aparıcı müəllifi Nataşa Marosinin sözlərinə görə, indiyədək yetkin köpəkbalıqlarının qohumları ilə vaxt keçirməyə üstünlük verdiyi müşahidə edilməmişdi.

Alimlər hesab edirlər ki, köpəkbalıqları qohumlarını hələ erkən yaşlarında, çaylar və estuarilərdə birlikdə böyüdükləri dövrdə tanımağı öyrənirlər və bu bacarığı yetkin yaşda da qoruyub saxlayırlar.

Tədqiqat müəllifləri bildirirlər ki, ailə bağlarının rolu əslində daha böyük ola bilər. Lakin bunu araşdırmaq çətindir, çünki qeyri-qanuni balıq ovu nəticəsində çoxlu sayda gənc köpəkbalığı sahilyanı sularda məhv olur və onların yalnız kiçik bir hissəsi yetkin yaşa çatır.

Alimlərin fikrincə, bu araşdırma köpəkbalıqlarının yalnız tək yaşayan yırtıcılar olduğu barədə mövcud təsəvvürləri dəyişir və onların sosial davranışlarının düşünüldüyündən xeyli mürəkkəb olduğunu göstərir.