Çin kosmik sənayesi növbəti uğurlu buraxılışa imza atıb. Ölkənin “Lician-2 Y2” (Kinetica 2 Y2) daşıyıcı raketi “Tsianfan” (Qianfan) internet peyklərinin daha 18-ni orbitə çatdırıb.

Çin Mərkəzi Televiziyasının (CCTV) məlumatına görə, CAS Space şirkətinə məxsus raketin buraxılışı ölkənin şimal-qərbində, Tszyutsüan kosmodromunun yaxınlığında yerləşən Dunfenq kommersiya kosmik innovasiyalar zonasından həyata keçirilib. Buraxılış Pekin vaxtı ilə saat 08:15-də baş tutub. Bütün peyklər nəzərdə tutulan qütb orbitlərinə uğurla yerləşdirilib.

Bu, genişzolaqlı internet xidmətləri göstərmək üçün yaradılan Spacesail Constellation peyk qruplaşmasına daxil edilən 17-ci peyk partiyasıdır. Son buraxılışdan sonra orbitdəki peyklərin ümumi sayı 276-ya çatıb.

Layihəni idarə edən dövlətə məxsus Shanghai Spacesail Technologies şirkəti gələcəkdə orbitdəki peyklərin sayını 12 minə çatdırmağı planlaşdırır. Qruplaşmanın yaradılmasına 2024-cü ilin avqustunda başlanılıb.

Peyklər aşağı Yer orbitində fəaliyyət göstərir və Ku, Q və V tezlik diapazonlarından istifadə etməklə məlumat ötürülməsi və rabitə xidmətlərinin təmin olunması üçün nəzərdə tutulub.

Qeyd edək ki, “Lician-1” yüngül bərk yanacaqlı raketinin çəkisi 135 ton, hündürlüyü 30 metr, diametri isə 2,65 metrdir. Bu raket aşağı Yer orbitinə 1,5 tona qədər faydalı yük çıxarmaq qabiliyyətinə malikdir.