Anım günləri çərçivəsində hər zaman olduğu kimi, bu dəfə də millət vəkili Məşhur Məmmədovun təşəbbüsü ilə şəhid ailələri ilə görüşlər keçirilib. Deputatın sözlərinə görə, məqsəd yalnız bir anım mərasimi təşkil edib məzarları ziyarət deyil, həm də şəhid ailələrinin qayğı və problemlərini yerindəcə dinləmək, onların yanında olmaqdır.

Deputat Məşhur Məmmədov qeyd edib ki, bu dəfə görüşlər Qarğalıq kəndində və Qarğalıq İnzibati Ərazi Dairəsinə daxil olan Eminli, Xallıcallı, Qədirli və Kürdəbaz kəndlərində baş tutub.
“Bacardığımız qədər çalışırıq ki, daha çox kəndlərdə olaq, daha çox şəhid ailələrilə görüşək. Onların hər biri bizim üçün müqəddəs əmanətdir. Bu ailələrin üzvləri ilə söhbətlər zamanı bir daha şahidi oluruq ki, şəhid valideynləri, həyat yoldaşları, övladları necə böyük qürur və fədakarlıq hissi ilə yaşayırlar. Bu qürur bizim dövlətimizin, millətimizin mənəvi dayağıdır,” – deyə deputat vurğulayıb.

Görüş zamanı şəhid ailələrinin müxtəlif qayğı və arzuları dinlənilib, gündəlik həyatda qarşılaşdıqları sosial və məişət məsələlərinin həlli ilə bağlı qeydlər götürülüb. Millət vəkili Məşhur Məmmədovun sözlərinə görə, belə görüşlər sadəcə formal xarakter daşımır – əksinə, bu, davamlı diqqət və qayğının təzahürüdür.

“Şəhid ailələri ilə görüşlər bizə bir daha xatırladır ki, bu torpaqlarda müstəqil və azad yaşamağımızın əsasında qəhrəman övladlarımızın qanı və fədakarlığı dayanır. Müstəqilliyimiz, azadlığımız, bu gün üzərində yaşadığımız hər qarış torpaq məhz şəhidlərimizin canı bahasına möhkəmlənib,” – deyə millət vəkili bildirib.

Görüşlər zamanı deputat Məşhur Məmmədov, köməkçiləri və yerli icra nümayəndələri şəhidlərin məzarlarını ziyarət edib, ruhlarına dualar oxuyaraq dərin ehtiramlarını ifadə ediblər. Şəhid məzarları önündə bir daha Azərbaycanın bu günkü qüdrətinin məhz həmin igidlərin qəhrəmanlığı üzərində qurulduğu vurğulanıb.

Deputat bildirib ki, şəhid ailələri ilə görüşlər davamlı xarakter daşıyır və bundan sonra da bu istiqamətdə fəaliyyətlər genişlənəcək:
“Biz hər zaman şəhid ailələrinin yanındayıq. Onların mənəvi dəstəklə yanaşı, sosial rifahının yaxşılaşdırılması da bizim əsas vəzifəmizdir. Allah bütün şəhidlərimizə rəhmət eləsin, ruhları qarşısında ehtiramla baş əyirik.”