Oktyabrın 22-də Milli Məclisdə Müdafiə, təhlükəsizlik və korrupsiya ilə mübarizə komitəsinin təşkilatçılığı ilə Vətən müharibəsində qazanılmış şanlı Zəfərin birinci ildönümünə həsr olunmuş konfrans keçirilib. Konfransda Milli Məclis sədrinin birinci müavini Əli Hüseynli, komitənin üzvləri, Milli Məclis Aparatının əməkdaşları, dəvət olunmuş hərbçilər, KİV nümayəndələri iştirak ediblər.
Konfrans iştirakçılarını salamlayan Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərovun təklifi ilə öncə Vətən uğrunda canlarını qurban vermiş şəhidlərin əziz xatirəsi bir dəqiqəlik sükutla yad olunub, onlara Allahdan rəhmət diləkləri səslənib.
Sonra konfrans işinə başlayıb. Ziyafət Əsgərov bildirib ki, bu tədbir Milli Məclisin sədri Sahibə Qafarovanın təşəbbüsü və tövsiyəsi ilə keçirilir. Məqsəd 44 günlük Vətən müharibəsində bizim qalibiyyətimizin, Azərbaycanın böyük Zəfərinin əhəmiyyəti haqqında söhbət açmaq, fikirlərimizi bölüşmək, həmin günlərdə Ermənistan tərəfinin bütün humanitar qaydaları pozmasını və müvafiq beynəlxalq konvensiyalara zidd hərəkətlərini müzakirə etməkdir.
Komitə sədri giriş nitqində 44 günlük müharibədəki Qələbəyə aparan yoldan söz açıb. Müstəqilliyini 1991-ci ildə bərpa edən Azərbaycanda ordu quruculuğunun məhz Ulu öndər Heydər Əliyevin hakimiyyətə qayıdışından sonra başlandığını vurğulayıb. Qalibiyyətin təməl prinsiplərinin 1993-cü ildən etibarən öncə xalqımızın Ümummilli lideri Heydər Əliyev tərəfindən qoyulduğunu, sonra isə bu siyasi kursun Azərbaycan Prezidenti, Ali Baş Komandan İlham Əliyev tərəfindən uğurla davam etdirildiyini qeyd edib. Uzun illər aparılan məqsədyönlü dövlət siyasəti nəticəsində ölkəmizdə müasir texnika ilə təchiz edilmiş, yüksək səviyyəli peşəkar hərbi kadrlara malik güclü Azərbaycan Ordusunun yarandığını bildirib. Vurğulayıb ki, 2020-ci ilin payızında müzəffər Ali Baş Komandanın rəhbərliyi ilə 30 illik işğala son qoyulması, ölkəmizin ərazi bütövlüyünün təmin edilməsi, BMT Təhlükəsizlik Şurasının uzun illər kağız üzərində qalmış 4 qətnaməsinin icrası rəşadətli Azərbaycan Ordusunun nəyə qadir olduğunu, Azərbaycan dövlətinin gücünü və qüdrətini bütün dünyaya nümayiş etdirdi.
Sonra konfransda hərbçilərə söz verilib. Hərbi ekspert, ehtiyatda olan polkovnik Şair Ramaldanov I Qarabağ müharibəsi ilə II Qarabağ müharibəsi dövrünü müqayisəli təhlil edib. Ordunun başında güclü liderin, qətiyyətli sərkərdənin olması vacibliyindən, bütün əməliyyatların vahid mərkəzdən idarə edilməsi zərurətindən söz açıb. Müstəqil Azərbaycanın milli ordusunun yaradılmasında Ulu öndərin müstəsna xidmətlərini qeyd edib. Vurğulayıb ki, Ali Baş Komandan İlham Əliyev çox qısa müddətdə Azərbaycan Ordusunu inkişaf etdirərək dünyanın ən güclü 50 ordusu sırasına çatdırıb. Bildirib ki, hazırda YAŞAT Fondu və Heydər Əliyev Fondu şəhid və qazi ailələrinə, yaralıların müalicəsinə böyük diqqət yetirirlər.
Tədbirdə Vətən Müharibəsi Qəhrəmanı, polkovnik Babək Ələkbərov iftixarla qeyd edib ki, II Qarabağ müharibəsində Ali Baş Komandanın qarşıya qoyduğu vəzifələr yerinə yetirilib. Hər bir Azərbaycan əsgərinin, hər bir Azərbaycan sərhədçisinin arzusu – torpaqlarımızın işğaldan azad olunması və bayrağımızın o bölgələrdəki yüksəkliklərdə dalğalanması təmin edilib. O, yüksək səviyyəli hərbi hazırlığın müharibədə köməyə gəldiyini bildirib, ordunun müasir texnika və silahlarla təchiz olunmasının əhəmiyyətini qeyd edib. Füzuli, Qubadlı, Zəngilan, Hadrut, Cəbrayıl, Şuşa uğrunda gedən döyüşlərdən söz açıb.
Konfransda Dövlət Sərhəd Xidmətinin Şəxsi heyət üzrə Baş idarənin rəisi Qinyaz Qaralov müharibə dövründə bu quruma verilmiş xüsusi tapşırıqlar barədə danışıb. Bir sıra əməliyyatlarda, o cümlədən düşmənin zenit-raket sistemlərinin aşkar edilərək sıradan çıxarılmasında sərhədçilərin xidmətlərini, həmçinin düşmənin 290 hərbi obyektini məhv etdiklərini qeyd edib. Vətənin ərazi bütövlüyü uğrunda, Zəfər naminə canlarından keçən igid sərhədçilərdən söz açıb. 44 günlük Vətən müharibəsində qazanılan Zəfərlə bağlı təbriklərini çatdırıb.
Vətən müharibəsi qazisi, xüsusi təyinatlı gizir Nicat Zalov ailədə vətənpərvər ruhda böyüdükləri üçün iki qardaş hərbçi olmağı seçdiklərini deyib. Aprel döyüşlərində və Vətən müharibəsində iştirakları barədə qeyri-adi epizodları yada salıb. Vətən Müharibəsi Qəhrəmanı adına layiq görülmüş şəhid qardaşı Fəqan Zalovun döyüş yolundan söz açıb, Vətənin bütövlüyü uğrunda şəhadətə ucalmış həmkarlarından danışıb. Düşmən üzərinə əzmlə yürüdüklərini, mətanətlə vuruşduqlarını bildirib. Azərbaycan Prezidentinin ordumuza, şəhid ailələrinə qayğısından, Milli Məclisin deputatlarının diqqət mərkəzində olmalarından razılığını ifadə edib.
Konfransda çıxış edən hərbçilərin hamısı hər an Ali Baş Komandanın əmrinə müntəzir olduqlarını, qalib ordunun əsgəri, zabiti olmalarıyla fəxr etdiklərini vurğulayıblar.
Sonra Müdafiə, təhlükəsizlik və korrupsiya ilə mübarizə komitəsinin sədr müavini Hikmət Məmmədov, komitənin üzvləri Aqil Abbas, Elman Məmmədov, Arzu Nağıyev çıxış edərək Vətən müharibəsinin intellektual, hibrid müharibə olduğu, yalnız döyüş meydanında deyil, diplomatiya və informasiya sahələrində də müharibə getdiyi barədə fikirlərini bölüşüblər. Qələbənin qazanılmasında Azərbaycan Prezidenti, Ali Baş Komandan İlham Əliyevin qətiyyətli mövqeyinin, yüksək intellektinin və sərkərdəlik məharətinin mühüm rol oynadığını vurğulayıblar. Çıxışlarda müharibə xronikası ətraflı təhlil olunub, erməni silahlı qüvvələrinin hərbi cinayətlərindən bəhs edilib. Azərbaycan əsgərinin vətənpərvərliyinin döyüşlərdə həlledici rol oynadığı qeyd olunub. Şəhidlərimizə rəhmət, qazilərimizə can sağlığı arzulanıb.
Milli Məclis sədrinin birinci müavini Əli Hüseynli konfransın yüksək səviyyədə keçdiyini qeyd edib. Azərbaycan Ordusunun Vətən müharibəsində nümayiş etdirdiyi ruh yüksəkliyinin, qətiyyətin və əzmkarlığın, yüksək mənəvi davranışın son illərdə dünya miqyasında baş verən heç bir müharibədə müşahidə edilmədiyini vurğulayıb. Qeyd edib ki, ordumuz kütləvi qırğınlara yol vermədi, mülki obyektlərə atəş açmadı. Hərbçilərimiz yüksək fiziki keyfiyyətlərlə yanaşı yüksək mənəvi keyfiyyətlərə də malikdirlər. Azərbaycan əsgəri və zabiti yüksək bilik daşıyıcısıdır, yüksək intellektə malik hərbçidir. Bu da Azərbaycan Ordusunun və xalqının uğurudur.
Komitə sədri Ziyafət Əsgərov konfransı belə bir arzu ilə yekunlaşdırıb ki, Ali Baş Komandanımızın rəhbərliyi ilə Ordu-Xalq birliyimiz əbədi olsun.