Kyodo: Yaponiya raket buraxılışından sonra Şimali Koreyaya etiraz edib.
Yaponiya hökuməti iki ballistik raketin buraxılmasından sonra Şimali Koreya hakimiyyətinə etiraz edib. Bu barədə Kyodo agentliyi Yaponiya Nazirlər Kabinetindəki mənbələrə istinadən məlumat yayıb.

Agentliyin məlumatına görə, etiraz Yaponiyanın Çindəki səfirliyi vasitəsilə bildirilib.

Bundan əvvəl Koreya Respublikası Silahlı Qüvvələrinin Baş Qərargah Rəisləri Komitəsi Şimali Koreyanın Yapon dənizi istiqamətində iki ballistik raket atdığını bildirmişdi.

NHK həmçinin Şimali Koreya raketinin Yaponiyanın müstəsna iqtisadi zonasından kənara düşdüyünü bildirib.

İyulun 14-də Şimali Koreyanın BMT-dəki daimi nümayəndəsi Kim Son BMT Təhlükəsizlik Şurasının iclasında bəyan edib ki, ABŞ Cənubi Koreyaya nüvə sualtı qayığı göndərməklə Koreya yarımadasında nüvə silahı yerləşdirməyə çalışır. O, həmçinin ABŞ-ı təxribat xarakterli casusluq fəaliyyətində ittiham edib.