Moskva formatı ölkələri Talibanı Əfqanıstanda həyat səviyyəsini yaxşılaşdırmağa çağırıb

Əfqanıstanla bağlı Kazanda keçirilən toplantıda iştirak edən ölkələr Taliban rejimini əfqanların həyat səviyyəsinin yaxşılaşdırılması üçün tədbirlər görməyə çağırıb. Müvafiq bəyannamənin mətni Rusiya Xarici İşlər Nazirliyinin saytında yerləşdirilib.

“Biz hazırkı Əfqanıstan hakimiyyətinin uğurlu addımları nəticəsində Əfqanıstanda tiryək əkininin azaldılması ilə bağlı xəbərləri qeyd etdik. <..> Biz Əfqanıstanın hazırkı hakimiyyət orqanlarını əfqan xalqının həyat səviyyəsini yaxşılaşdırmaq, gələcək miqrasiyanın və qaçqınların geri qayıtmasının qarşısını almaq üçün lazımi şərait yaratmağa çağırdıq”, - bəyanatda deyilir.

Qeyd olunur ki, görüşdə iştirak edən ölkələr “Əfqanıstanda ölkədəki bütün etno-siyasi qrupların maraqlarını əks etdirəcək həqiqətən inklüziv hökumətin formalaşmasında irəliləyişin olmamasından” təəssüfləndiklərini bildiriblər.

İclasda Hindistan, İran, Qazaxıstan, Çin, Qırğızıstan, Pakistan, Rusiya, Türkmənistan və Özbəkistandan xüsusi nümayəndələr və yüksək vəzifəli şəxslər iştirak ediblər.

Sentyabrın 29-da Taliban nümayəndə heyəti Əfqanıstan üzrə “Moskva formatı”nda danışıqlar aparmaq üçün Kazana gəlib.

Əfqanıstan münaqişəsinin həlli ilə bağlı “Moskva formatı”nın ilk iclası 2017-ci ilin aprelində keçirilib. Tədbirdə Rusiya Federasiyası və Əfqanıstanın nümayəndələri ilə yanaşı, digər doqquz ölkənin xarici işlər nazirlərinin müavinləri və xüsusi nümayəndələri də iştirak ediblər.

“Moskva formatı”nın əsas məqsədinin Əfqanıstanda milli barışıq və sülhün bərqərar olması prosesini təşviq etmək olduğu bildirilir.