Rusiya və Azərbaycan baytarlıq nəzarəti sahəsində sistemlərin ekvivalentliyinin tanınması proseduruna başlayıb. Bu barədə “Rosselxoznadzor” məlumat yayıb.

Bu məsələ digər məsələlərlə yanaşı, Azərbaycan Qida Təhlükəsizliyi Agentliyinin nümayəndələri ilə danışıqlar zamanı müzakirə olunub.

Bundan əlavə, hər iki ölkənin mütəxəssisləri transsərhəd heyvan xəstəliklərinin, o cümlədən SAT-2 dabaq xəstəliyinin yeni sortunun daxil olmasının qarşısının alınması, eləcə də heyvanların quduzluğa qarşı birgə immunizasiyası sahəsində əməkdaşlıq məsələlərinə diqqət yetiriblər.

Xəbər verdiyimiz kimi, noyabrda Rosselxoznadzorun rəhbəri Sergey Dankvert və Azərbaycan Qida Təhlükəsizliyi Agentliyinin rəhbəri Qoşqar Təxməzli bu xəstəliklərə qarşı birgə sistemli tədbirlərin hazırlanması üçün işçi qrupunun yaradılması barədə qərar qəbul ediblər. Xüsusilə, SAT-2 serotip dabaq xəstəliyi virusunun yayılmasının qarşısını almaq üçün Rosselxoznadzorun tabeliyində olan "ARRIAH" Federal Dövlət Büdcə Müəssisəsi multivalent immunobioloji preparat hazırlayıb. ARRIAH həmçinin agentlik nümayəndələri üçün ixrac-idxal əməliyyatları zamanı quduzluğun diaqnostikası və risk təhlili üzrə təlimlər təşkil etməyi planlaşdırır.

Danışıqlar zamanı Rusiya xidməti azərbaycanlı həmkarlarına Rusiyaya yumurta tədarükünə operativ şəkildə başlanıldığına görə minnətdarlığını bildirib. Rusiya Federasiyası artıq Azərbaycandan ümumi həcmi 1 milyon 224 min ədəd olan iki partiya yumurta alıb.