Nazirlər Kabineti 2029-cu ildə Azərbaycanda keçiriləcək əhalinin siyahıyaalınmasına hazırlıq və onun təşkili ilə bağlı Tədbirlər Planını təsdiqləyib. Müvafiq qərar ölkə üzrə siyahıyaalınmanın yüksək səviyyədə təşkili, dövlət qurumlarının fəaliyyətinin əlaqələndirilməsi və müasir məlumat bazalarının formalaşdırılması məqsədi daşıyır.

Qərara əsasən, əhalinin siyahıyaalınması 2029-cu il oktyabrın 1-i saat 00:00 vəziyyətinə keçiriləcək. Hazırlıq prosesinin səmərəliliyini qiymətləndirmək məqsədilə isə 2028-ci il oktyabrın 1-dən 31-dək Xaçmaz rayonu ərazisində sınaq siyahıyaalınması aparılacaq.

Tədbirlər Planına əsasən, Əhalinin Siyahıyaalınmasına Yardım üzrə Mərkəzi Komissiya yaradılacaq. Komissiya dövlət qurumlarının fəaliyyətini əlaqələndirəcək, hazırlıq prosesində yaranan məsələlərin operativ həllini təmin edəcək və görülən işlərlə bağlı mütəmadi olaraq Nazirlər Kabinetinə hesabat təqdim edəcək.

Sənəddə həmçinin inzibati məlumatların Dövlət Statistika Komitəsinin informasiya bazasına inteqrasiyası, siyahıyaalma məntəqələrinin yaradılması, sayıcıların seçilməsi və hazırlanması, eləcə də əhalinin geniş şəkildə məlumatlandırılması kimi mühüm tədbirlər nəzərdə tutulur. Bu addımlar siyahıyaalınmanın daha dəqiq, şəffaf və müasir texnologiyalar əsasında keçirilməsinə xidmət edəcək.

Əhalinin siyahıyaalınması ölkənin demoqrafik vəziyyətinin, sosial-iqtisadi göstəricilərinin və regional inkişaf meyillərinin müəyyənləşdirilməsi baxımından mühüm statistik tədbir hesab olunur. Toplanacaq məlumatlar dövlət proqramlarının hazırlanması, sosial siyasətin planlaşdırılması və gələcək inkişaf strategiyalarının müəyyən edilməsində əsas mənbələrdən biri olacaq.