ABŞ-nin Kaliforniya ştatında akulaların sayının artacağı ehtimal edilir. Buna səbəb isə El Niño meteoroloji hadisəsidir.
Məlumata görə, bu fenomen Sakit okeanın ekvatorial hissəsində suyun səth temperaturunun anormal yüksəlməsinə gətirib çıxarır. Nəticədə Cənubi Kaliforniya sahillərində suyun istiləşməsi müşahidə olunur və bu da akulaların miqrasiyasına təsir edir.

Mütəxəssislər bildirir ki, daha isti sular səbəbindən bəzi növlər – o cümlədən ağ akulalar və çəkicbaş akulalar – çoxalma üçün şimal istiqamətinə doğru hərəkət edə bilər. Eyni zamanda, daha cənubda yaşayan növlərin, məsələn, pələng akulalarının isə onların yerini tutaraq sahil bölgələrinə yaxınlaşacağı gözlənilir.

Alimlərin fikrincə, bu dəyişikliklər akulaların davranışında və yayılma coğrafiyasında müvəqqəti dəyişikliklərə səbəb ola bilər. Bu isə xüsusilə yay mövsümündə sahil zonalarında diqqətli olmağı zəruri edir.