İran İslam İnqilabı Keşikçiləri Korpusu (KƏSİR) Hörmüz boğazında iki neft tankerinin dəniz minalarına düşdüyünü açıqlayıb.

IRNA agentliyinin məlumatına görə, partlayışlardan biri nəticəsində tankerlərdən biri – supertanker alovlanıb.

KƏSİR-in iddiasına əsasən, gəmilər boğazdan «icazəsiz marşrut» üzrə hərəkət ediblər. Bildirilib ki, tankerlər ABŞ hərbçilərinin dəstəyi ilə gizli şəkildə keçməyə çalışarkən avtomatik identifikasiya sisteminin (AIS) transponderlərini söndürüblər.

Qeyd olunur ki, partlayışlardan sonra hər iki gəmi hərəkəti dayandırıb.

Hadisə ilə bağlı tankerlərin adları, eləcə də ölən və yaralananların olub-olmaması barədə hələlik məlumat verilməyib.

Məlumat: Hadisə ilə bağlı açıqlama İran İslam İnqilabı Keşikçiləri Korpusuna məxsusdur və müstəqil təsdiq olunmayıb.