Moldova prezidenti vəzifəsini icra edən Maia Sandu dövlət başçısı seçkilərinin ikinci turunda qalib gəldiyini elan edib. O, X sosial şəbəkəsində (keçmiş Twitter) müvafiq yazı dərc edib.

“Moldova, bu gün siz qalib gəldiniz. Biz birlikdə birliyimizin gücünü, demokratiyamızı və layiqli gələcəyə sadiqliyimizi nümayiş etdirdik”, - deyə siyasətçi yazıb.

O, respublika vətəndaşlarına da minnətdarlığını bildirib.

Azadmedia.az xatırladır ki, noyabrın 3-də Moldovada prezident seçkilərinin ikinci turu keçirilib. Moldova Mərkəzi Seçki Komissiyası seçici fəallığının 20%-i ötdüyü üçün ölkədə prezident seçkilərinin ikinci turunu keçirilmiş kimi tanıyıb.

Oktyabrın 20-də keçirilən seçkilərin birinci turunda Sandu 42,49 faiz, Stoyanoqlo isə 25,95 faiz səs toplayıb. Moldovada prezident seçkilərinin gedişini izləyən müşahidəçilər 141 qanun pozuntusu qeydə alıblar.