Ukraynanın cənubunda yerləşən Odessada bir neçə partlayış baş verib. Bu barədə yerli “İctimai” nəşri Telegram kanalında məlumat yayıb.
Jurnalistlər gecə saat təxminən 23:42-də şəhərdə ilk partlayışlar seriyası barədə yazıblar. Daha sonra yaşayış məntəqəsində yenidən oxşar səslər eşidilib.
“Odessada yenidən partlayış səsləri eşidildi”, — deyə saat 01:10-da yayımlanan materialda bildirilir.
Ukraynanın Rəqəmsal Transformasiya Nazirliyinin onlayn xəritəsinin məlumatına görə, Odessa vilayətində hava həyəcanı aprelin 29-u axşam saatlarında elan olunub. Sirenlər təxminən saat 23:21-də işə düşüb.
Bundan bir gün əvvəl Ukraynanın şərqində yerləşən Xarkov şəhərində infrastruktur obyektində böyük yanğın baş verib. Yerli “Strana.ua” nəşrinin məlumatına görə, yanğın partlayışdan sonra başlayıb. Həmin vaxt Xarkov vilayətində hava həyəcanı qüvvədə olub. Xüsusi rejim həmçinin Çerniqov, Dnepropetrovsk və Sumı vilayətlərində də tətbiq edilib.
Aprelin 28-də Ukraynanın səkkiz regionunda enerji infrastrukturuna ziyan dəydiyi üçün elektrik enerjisi kəsilib. Dnepropetrovsk, Xmelnitski, Sumı, Odessa, Xarkov, Çerniqov, Kiyev və Poltava vilayətlərinin sakinləri müvəqqəti olaraq işıqsız qalıblar. Bundan əlavə, Ukrayna hakimiyyətinin nəzarətində olan Zaporojye və Xerson vilayətlərinin bəzi hissələrində də nasazlıqlar qeydə alınıb.