ABŞ-ın təklif etdiyi memorandumla bağlı cavabın İran hakimiyyəti tərəfindən artıq bu gün təqdim oluna biləcəyi bildirilir. Cavab vasitəçi ölkə kimi çıxış edən Pakistan vasitəsilə çatdırılacaq.
CNN-in regiondakı mənbəyə istinadən verdiyi məlumata görə, Tehran Vaşinqtonun təklifinə 7 may tarixində cavab verəcək.
Bundan əvvəl ABŞ İrana qarşılıqlı anlaşma memorandumu imzalamağı təklif etmişdi. İran Xarici İşlər Nazirliyinin rəsmi nümayəndəsi Esmail Bəqainin sözlərinə görə, İranın cavabı vasitəçi rolunu oynayan Pakistana təqdim ediləcək.
Bloomberg mənbələrə istinadən yazır ki, Amerika memorandumunda Hörmüz boğazının mərhələli şəkildə açılması və İran limanlarına tətbiq olunan dəniz blokadasının aradan qaldırılması təklif olunur. Bununla yanaşı, nüvə sazişinin şərtlərinin memorandum imzalandıqdan sonra ayrıca müzakirə ediləcəyi bildirilir.
Axios-un qiymətləndirməsinə görə, sənəd yaxın 24–48 saat ərzində tərəflər tərəfindən imzalana bilər. Bununla belə, Bloomberg qeyd edir ki, İranın dövlət mediasında yayımlanan məlumatlara əsasən, ABŞ-ın bəzi təklifləri Tehran üçün hələ də qeyri-real hesab olunur.