Bayden ABŞ-ın Türkiyəyə F-16-nın satışı ilə bağlı sövdələşməni bağlaya biləcəyinə əmin olduğunu bildirib.
ABŞ prezidenti Co Bayden jurnalistlərə deyib ki, o, ABŞ hakimiyyətinin Türkiyəyə F-16 qırıcı təyyarələrinin satışı ilə bağlı sövdələşməni başa çatdıra biləcəyinə əmindir. Bu barədə “Reuters” məlumat yayıb.

Bundan əvvəl Türkiyə prezidenti Rəcəb Tayyib Ərdoğan mətbuat konfransı zamanı ABŞ-dan F-16 qırıcılarının alınması ilə bağlı sövdələşmənin müsbət nəticələnəcəyinə "həmişəkindən daha çox ümid etdiyini" bildirmişdi.

Həmçinin iyulun 12-də ABŞ Dövlət Departamentinin sözçüsü Metyu Miller bildirib ki, Birləşmiş Ştatlar səlahiyyətliləri Konqres üzvlərinin Türkiyəni F-16 qırıcılarının ölkəyə təhvil verilməsini təsdiqləmək üçün müəyyən şərtləri yerinə yetirməyə məcbur etməyəcəyinə zəmanət vermir. Miller qeyd edib ki, o, Türkiyəyə qırıcıların satışına zəmanət verə bilməz, çünki o, ABŞ Konqresinin üzvləri adından danışa bilməz. O, agentliyin F-16-ların Türkiyəyə satışını dəstəklədiyini və bu istiqamətdə hərəkət etməyi planlaşdırdığını, lakin satışın ABŞ Konqresi tərəfindən təsdiqlənməli olan tərəflərinin olduğunu vurğulayıb.