Fransa tərəfi öz daxili işlər naziri Jerar Darmaninin məsuliyyətsiz və qəbuledilməz bəyanatına görə nəinki üzr istəmədi, əksinə, daha böyük güclə “Le Point” qəzetində və digər bu kimi KİV-lərdə Azərbaycana qarşı böhtan kampaniyasına başladı. Bunu Azərbaycan Xarici İşlər Nazirliyinin mətbuat katibi Ayxan Hacızadə deyib.

“Fransanın Azərbaycana qarşı apardığı kampaniya öz xarici siyasətinin uğursuzluğunu ört-basdır etmək cəhdidir, hamı bilir ki, dünyaya “demokratiya dərsi” öyrətməyə çalışan bu ölkə beynəlxalq hüquq və insan haqları normalarını kobud şəkildə pozur. neokolonial siyasət həyata keçirir, irqçilik, ayrı-seçkilik və islamofobiyanı təbliğ edir”, - deyə o bildirib.

Diplomatın fikrincə, Fransa Azərbaycanı “diktatura” adlandırmazdan əvvəl onun “fəaliyyətinə” diqqət yetirməlidir.

Fransa tərəfi əmin olmalıdır ki, onun anti-Azərbaycan kampaniyası, eləcə də ədəbsiz bəyanatları və təxribatları cavabsız qalmayacaq.

Xatırladaq ki, mayın 16-da Fransanın daxili işlər naziri Jerar Dermanin “France 2” telekanalına müsahibəsində Azərbaycanı “diktatura” adlandırmışdı. Xarici İşlər Nazirliyi Daxili İşlər Nazirliyi rəhbərinin bəyanatına görə Fransa tərəfdən üzr istəməsini tələb edib.